Al Muajam Al Kabir Tibrani

حضرت عبد اللہ بن عمر رضی اللہ عنہما فرماتے ہیں کہ نبی کریم صلی اللہ علیہ وسلم تا نبے کے ایک بت کے پاس سے گزرے تو آپ صلی اللہ علیہ وسلم نے اپنی ہتھیلی کی پیٹھ کے ساتھ اس کی پیٹھ پر مارا ‘پھر فرمایا: خائب و خاسر ہوا جس نے اللہ کو چھوڑ کر تیری عبادت کی۔ پھر نبی کریم صلی اللہ علیہ وسلم کے پاس حضرت جبریل علیہ السلام آئے ‘ان کے ساتھ ایک فرشتہ تھا‘وہ فرشتہ پیچھےہٹا‘ آپ صلی اللہ علیہ وسلم نے فرمایا: آپ کو کیا ہوا؟ کیوں ہٹ رہے ہو؟ عرض کی: آپ سے تانبے کی بُو آ رہی ہے اور میں تانے کی بُو برداشت نہیں کر سکتا۔

حضرت از رق بن قیس سے روایت ہے ‘فرمایا: میں نے حضرت عبد اللہ بن عمر رضی اللہ عنہما کو دیکھا اس حال میں کہ آپ نماز میں جب کھڑے ہونے لگتے تو سہارا لیتے۔ میں نے عرض کی : اے ابو عبد الرحمٰن ! یہ کیا ہے؟ فرمایا: میں نے رسول کریم صلی اللہ علیہ وسلم کو دیکھا‘نماز میں آپ صلی اللہ علیہ وسلم سہارا لیتے تھے۔

حضرت عبداللہ بن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: دجال ‘اس شوریلی زمین میں اترے گا‘ پس اس کی طرف نکلنے والوں کی زیادہ تعداد عورتوں کی ہوگی یہاں تک کہ آدمی اپنے قریبی یعنی ماں ‘بیٹی یا بیوی کی طرف جانے کا ارادہ کرے گا پر اس کی رباط باندھ دے گا یہاں تک کہ وہ عورت اس کے ساتھ مل جائے گی ۔ پس رسول کریم صلی اللہ علیہ وسلم نے فرمایا : پھر اس پر اور اس کے شیعوں پر غلبہ پا لیا جائے گا جبکہ اس کے شیعہ یہودی ہوں گے‘ پس وہ قتل ہو جائیں گے یہاں تک کہ ان میں سے کوئی ایک پتھر یا درخت کے پیچھے چھپا ہو گا تو وہ پتھر یا درخت کہے گا: اے مؤمن ! یہ دیکھ میرے پیچھے یہودی چھپاہوا ہے ‘پس اسے قتل کر دے۔

حضرت عبد اللہ بن عمر رضی اللہ عنہما فرماتے ہیں کہ میں نبی کریم صلی اللہ علیہ وسلم کی خدمت میں حاضر ہوا جبکہ میں نے چادر پہنی ہوئی تھی جو زمین پر گھسٹ رہی تھی‘فرمایا: یہ کون ہے؟ میں نے عرض کی : عبداللہ ! فرمایا: اگر اللہ کا بندہ ہے تو اپنی چادر کو نصف پنڈلیوں تک اوپر کر لے۔ اس کے بعد تاحیات آپ نے اپنی از اراد پر ہی رکھی۔

حضرت عبداللہ بن عمر رضی اللہ عنہما سے مروی ہے کہ رسول کریم صلی اللہ علیہ وسلم نے فرمایا: مسوفات پر اللہ تعالیٰ کی لعنت ہو! عرض کی گئی : مسوفات کون ہیں؟ فرمایا: وہ عورت جس کو اس کا خاوند بستر کی طرف بلائے اور وہ کہے: ہاں ! تھوڑی دیر بعد یہاں تک کہ اسے نیند آ جائے۔

حضرت عبداللہ بن عمر رضی اللہ عنہما سے مروی ہے کہ رسول کریم صلی اللہ علیہ وسلم ایک دن قبروں کے درمیان سے گزرے اس حال میں کہ آپ صلی اللہ علیہ وسلم کے پاس تر کھجور کی لکڑی تھی۔ آپ نے اسے دوحصوں میں تقسیم فرمایا‘ایک کو ایک قبر پر اور دوسری کو دوسری قبر پر رکھ دیا اور پھر چل دیئے۔ ہم نے عرض کی: اے اللہ کے رسول ! آپ نے ایسا کیوں کیا؟۔ (اس میں حکمت کیا ہے؟) فرمایا: پس ان میں سے ایک کو چغلخوری اور دوسرے کو پیشاب کے قطروں سے نہ بچنے کی وجہ سے عذاب ہو رہا تھا ‘اب عذاب نہ ہو گا جب تک یہ تر رہیں گی۔

حضرت میسرہ اشجعی ‘حضرت عبداللہ بن عمر رضی اللہ عنہما کے بارے میں روایت کرتے ہیں کہ انہوں نے آپ کے ساتھ حج کیا یہاں تک کہ وقوفِ عرفات کیا‘پس آپ نے ان سے کہا: اے میسرہ! (سواری کو ) پہاڑ میں جا کر باندھ دو۔ راوی کا بیان ہے: میں نے ایسا کیا‘ پس جب لوگ عرفات کے میدان سے لوٹے تو میں اپنی اونٹنی کی حفاظت کے لیے گیا۔ فرمایا: دو گردنوں کے درمیان ایک گردن کے ساتھ ۔ پس جب میں نے پہاڑ پار کیا تو میں نے عرض کی: اے ابو عبدالرحمٰن ! کیا آپ اتریں گے؟فرمایا: اے میسرہ ! چلو ۔ پس جب ہم مزدلفہ پہنچے تو آپ کھڑے ہوئے ‘اذان کہی پھر نماز قائم کی‘ پس آپ نے مغرب پڑھی پھر اقامت کہی اور عشاء کی نماز پڑھی‘ پھر ہم صبح تک وہاں رہے ‘انہوں نے مشعر ِحرام میں ایسے ہی کیا جیسے مشعرِ اوّل میں کیا تھا‘ پھر فرمایا: مشرکین‘سورج کی روشنی پہاڑوں میں نہیں بلکہ ان کی چوٹیوں پر آجانے کے بعد عرفات سے لوٹتے ہیں جبکہ رسول کریم صلی اللہ علیہ وسلم غروب شمس کے ساتھ لوٹ آتے اور مشرکین‘ مزدلفہ سے نہیں لوٹتے تھے یہاں تک کہ کہتے : اے ثبیر! چمک جا۔ پس وہ نہیں لوٹتے تھے یہاں تک کہ سورج پہاڑوں کی چوٹیوں پر آ جاتا جیسے لوگوں کی پگڑیاں ان کے مونہوں پر جبکہ رسول کریم صلی اللہ علیہ وسلم سورج طلوع ہونے سے پہلے لوٹ آتےتھے۔

حضرت عبداللہ بن عمر رضی اللہ عنہما فرماتے ہیں: جو آدمی اپنے مسلمان بھائی کی ضرورت میں چلا‘اللہ تعالیٰ اس پر پچھتر ہزار فرشتوں کو مقرر فرمائے گا کہ وہ اُس کیلئے دعا کریں گے‘ وہ مسلسل اللہ کی رحمت میں غوطہ زن رہے گا یہاں تک کہ وہ فارغ ہو جاے‘ پس جب وہ فارغ ہوگا تو اللہ تعالیٰ اس کیلئے ایک حج اور عمرہ کا ثواب لکھے گا‘ جس نے مریض کی عیادت کی تو اللہ تعالی ٰاس کیلئے پچھتر ہزار فرشتے مقرر فرمائے گا جو ہر قدم پر اس کیلئے نیکی لکھیں گے جو وہ اُٹھائے گا اور رکھے گا تو اس کی خطا معاف فرمائے گا اور اس کا ایک درجہ بلند کرے گا یہاں تک کہ وہ اپنے ٹھکانے پر بیٹھ جائے گا۔ پس جب وہ بیٹھے گا تو اللہ کی رحمت اسے ڈھانپ لے گی‘ پس وہ اسی حال میں رہے گا یہاں تک کہ وہ اپنے گھر واپس آ جائے۔

حضرت ابن عمر رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا جبکہ آپ منبر پر تشریف فرما تھے اور آپ جمعہ کے دن غسل کرنے کا حکم دے رہے تھے۔

حضرت عبداللہ بن عمر رضی اللہ عنہما فرماتے ہیں کہ حضور صلی اللہ علیہ وسلم نے ذی الحلیفہ میں رات گزاری ‘وہاں مسجد میں نماز پڑھی۔

حضرت مجاہد فرماتے ہیں کہ مجھے اور میرے دوست کو حضرت عبداللہ بن عمر رضی اللہ عنہما نے الوداع کیا‘میں مدینہ سے عراق جارہا تھا‘ پس جب آپ واپس ہونے لگے تو فرمایا: تم دونوں کو دینے کی خاطر میرے پاس کوئی تحفہ تو نہیں ہے لیکن میں نے رسول کریم صلی اللہ علیہ وسلم کو فرماتے ہوئے سنا: بے شک اللہ تعالیٰ کے سپر د جب کوئی چیز کی جاتی ہے تو وہ اس کی حفاظت فرماتا ہے ‘میں تم دونوں کے ادین ‘امانت اور تمہارے عملوں کے انجام کو اللہ کے حوالے کرتا ہوں

حضرت عبداللہ بن عمر رضی اللہ عنہما فرماتے ہیں کہ میں نے رسول کریم صلی اللہ علیہ وسلم کو فرماتے ہوئے سنا: آپ پڑوسی کیلئے وصیت فرما رہے تھے یہاں تک کہ ہمیں گمان ہوا کہ اسے وارث بنادیں