Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ میں نے رسول الله صلی اللہ علیہ وسلم کو فرماتے ہوئے سنا: عادی شرابی ‘اللہ پر اپنے عمل کا احسان جتانے والا اور اپنے والدین کا نافرمان جنت میں داخل نہیں ہو سکیں گے۔

حضرت ابن عمر رضی اللہ عنہما فرماتے ہیں کہ میں نے رسول الله صلی اللہ علیہ وسلم کو فرماتے ہوئے سنا: جس نے مؤمن کو بغیر وجہ کے ڈرایا ‘تو اللہ نے اپنے ذمہ لیا ہے کہ قیامت کی گھبراہٹ سے اسے امن نہ دے۔

حضرت عبداللہ بن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: تین آدمی جنت میں داخل نہ ہوں گے اور تین آدمیوں کی طرف قیامت کے دن اللہ تعالیٰ نظر نہ فرمائے گا ‘بہر حال وہ تین جو جنت میں داخل نہ ہوں گے تو وہ یہ ہیں: والدین کا نافرمان‘دیوث (بے غیرت ) اور وہ عورت جو مردوں والی شکل اختیار کرے اور وہ تین آدمی جن کی طرف اللہ نظر نہ کرے گا تو وہ یہ ہیں: والدین کا نافرمان ‘عادی شرابی اور اپنے عطیہ پر احسان جتانے والا۔

حضرت عبداللہ بن عمر رضی اللہ عنہما فرماتے ہیں کہ میں نے رسول کریم صلی اللہ علیہ وسلم کی ہجرت کی ‘میں آپ صلی اللہ علیہ وسلم کے دروازے پر بیٹھ گیا ‘ پس آپ صلی اللہ علیہ وسلم نے سنا کہ دو آدمی ایک آیت کے بارے اختلاف کر رہے ہیں‘ پس آپ صلی اللہ علیہ وسلم ہماری طرف نکلے اس حال میں کہ آپ صلی اللہ علیہ وسلم کے چہرے سے غصہ ظاہر تھا‘فرمایا: تم سے پہلے لوگ ‘کثرت اختلاف کی وجہ سے ہی ہلاک ہوئے۔

حضرت عبداللہ بن عمر رضی اللہ عنہما سے مروی ہے کہ حضور صلی اللہ علیہ وسلم نے اس وقت احرام باندھنے کی نیت کی جب سواری پر سیدھے ہو کر بیٹھ گئے۔

حضرت عبداللہ بن عمر رضی اللہ عنہما فرماتے ہیں کہ رسول کریم صلی اللہ علیہ وسلم اپنے گھر سے ایک دن نکلے اس حال میں کہ آپ صلی اللہ علیہ وسلم کے صحابہ میں سے کچھ لوگ تھے ‘مدینہ شریف کے ایک راستہ پر چل کر ایک قوم کے صحن کے پاس سے گزرے جبکہ وہاں بکری کا ایک مردہ بچہ ان کے صحن میں ۔ پھینک دیا گیا تھا۔ پس رسول کریم صلی اللہ علیہ وسلم اس کے پاس کھڑے ہو گئے اور اس کی طرف دیکھنے لگے ‘پھر اپنے دوستوں کی طرف متوجہ ہو کر فرمایا: کیا اس کے مالکوں پر اس کا پھینکنا آسان تھا‘ جب انہوں نے اس کو پھینکا؟ صحابہ کرام نے عرض کی: اے اللہ کے رسول ! ہاں! فرمایا: قسم بخدا ! دنیا کے حوالے سے اللہ پر اس بکری کے بچے سے بھی زیادہ آسان ہے ‘جب ان لوگوں نے اس طرح اسے پھینکا۔

حضرت عبداللہ بن عمر رضی اللہ عنہما فرماتے ہیں کہ حروریہ سے ایک آدمی آیا ‘اس نے عرض کی: اے ابو عبد الرحمٰن!یقیناً آپ کو پسند ہو گا کہ آپ اپنے ساتھیوں کے ساتھ اس دنیا سے جائیں اور ان کے بعد باقی نہ رہیں‘کیا اس طرح آپ حج و عمرہ کر سکیں گے اور کیا جہاد ترک نہیں ہو جائے گا؟ پس آپ نے حروری کو جواب دیا: تیری ماں تجھے روئے ‘اگر تو ان کے بعد پچاس سال زندہ ر ہے تو تُو حسرت کیلئے ہی زندہ رہے گا۔ پھر حضرت عبداللہ بن عمررضی اللہ عنہما نے فرمایا: اسلام کی بنیاد پانچوں چیزوں پر ہے: اللہ کی عبادت کی جائے ‘نماز قائم کی جائے‘ زکوٰۃ ادا کی جائے‘ بیت اللہ کا حج کیا جائے‘ رمضان شریف کے روزے رکھے جائیں۔ پس شام کے بزرگوں میں سے وہاں موجود ایک نے کہا: کیا اللہ کی عبادت کرنے کا آپ حکم کرتے ہیں؟ فرمایا: ہاں! اس نے کہا: روزے کو حج سے پہلے لا ئیں ۔ آپ نے فرمایا: میں تو اسے آخر میں رکھوں گا ‘میں نے رسول کریم صلی اللہ علیہ وسلم کے منہ سے اسی طرح سنا تھا۔

حضرت عبداللہ بن عمر رضی اللہ عنہما فرماتے ہیں کہ رسول کریم صلی اللہ علیہ وسلم جب نماز پڑھنے لگتے تو اپنے ہاتھوں کو اُٹھاتے یہاں تک کہ نماز شروع کر لیتے اور جب رکوع کی تکبیر کہتے اور جب رکوع سے سر اُٹھاتے ۔

حضرت مکحول فرماتے ہیں کہ حضرت حویطب بن عبد العزیٰ ایک سفر میں حضرت عبداللہ بن عمر رضی اللہ عنہما کے ساتھ تھے تو حضرت عبداللہ نے اپنی سواری پر ہی نماز پڑھنا شروع کر دی ‘وہ اپنے سر کے ساتھ اس جانب اشارہ کرتے تھے ۔جس طرف چل رہے ہوتے تھے ۔ پس حضرت حویطب نے ان سے عرض کی : اے ابو عبد الرحمٰن ! کیا یہ چیز آپ نے رسول کریم صلی اللہ علیہ وسلم سے سنی ہے؟ پس حضرت عبد اللہ ہنس پڑے ‘فرمایا: ہاں ! میں نے رسول کریم صلی اللہ علیہ وسلم سے سنا تھا۔

حضرت ثابت بن ثوبان نے حضرت مکحول سے نمازِخوف کے حوالے سے سوال کیا تو انہوں نے فرمایا : حضرت عبداللہ بن عمر رضی اللہ عنہما فرمایا کرتے تھے کہ اُنہوں نے رسول کریم صلی اللہ علیہ وسلم کے ساتھ نماز پڑھی ‘فرمایا: رسول کریم صلی اللہ علیہ وسلم نے تکبیر کہی‘ پس ہم میں سے ایک گروہ نے آپ صلی اللہ علیہ وسلم کے پیچھے صفیں باندھیں اور ایک گروہ دشمن کے سامنے کھڑا ہوا ۔ پس آپ صلی اللہ علیہ وسلم نے ان کو ایک رکوع اور دو سجدے کروائے جس طرح صبح کی نماز کا نصف ہوتا ہے ‘پھر وہ چلے گئے اور دشمن کے سامنے جا کر کھڑے ہو گئے۔ دوسرا گروہ آیا اور انہوں نے رسول کریم صلی اللہ علیہ وسلم کی معیت میں نماز پڑھی۔ پس آپ صلی اللہ علیہ وسلم نے پہلے کی مثل کیا پھرآپ صلی اللہ علیہ وسلم نے اپنا سلام پھیر لیا ‘ پس دونوں گروہوں میں سے ہر آدمی نے اپنی اپنی نماز ایک رکوع اور دو سجدوں کے ساتھ ادا کی۔

حضرت یحییٰ فرماتے ہیں کہ میں نے حضرت عبد اللہ بن عمر رضی اللہ عنہما سے سنا کہ آپ فرما رہے تھے: نبی کریم صلی اللہ علیہ وسلم کے پاس ایک آدمی کی ہوا خارج ہو گئی تو آپ صلی اللہ علیہ وسلم نے فرمایا: اپنی ہوا کو روکو! کیونکہ جو دنیا میں زیادہ سیر ہوگا‘قیامت کے دن وہ زیادہ بھوکا ہو گا۔

حضرت عبداللہ بن عمر رضی اللہ عنہما سے مروی ہے کہ رسول کریم صلی اللہ علیہ وسلم نے فرمایا: جو کسی قوم کی امامت کروائے تو وہ تقویٰ اختیار کرے اور وہ جانے کہ وہ ضامن ہے ‘ذمہ دار ہے جیسے ضامن ہوتا ہے ‘پس اگر اس نے اچھے طریقہ سے امامت کروائی تو اس کیلئے ہر اس آدمی کے برابر اجر ہے جس نے اس کے پیچھے نماز پڑھی بغیر اس کے کہ ان کے اجر میں کسی قسم کی کوئی کمی کی جائے اور اس میں جو کمی ہو گی‘اس کا وبال امام پر ہوگا (مقتدیوں کو اپنی نماز کا پورا اجر ملے گا)۔