Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: تکبر سے بچو ! تکبر آدمی کی چادر میں بھی ہو سکتا ہے ‘یعنی چادر پہن کر تکبر کرے۔

حضرت سعید بن جبیر فرماتے ہیں کہ ایک آدمی نے حضرت ابن عمر رضی اللہ عنہما سے عرفہ کے دن کے روزے کے متعلق پوچھا ‘حضرت ابن عمر رضی اللہ عنہما نے فرمایا: ہم حضور صلی اللہ علیہ وسلم کے ساتھ تھے اور ہم اس دن کے روزے کا دو سال کے روزوں کے برابر ثواب سمجھتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: مسلمان پر حق ہے کہ ایک رات یا دو دن اس حالت میں نہ گزارے کہ وصیت اس کے پاس لکھی ہوئی نہ ہو۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم ہمیں استخارہ سکھاتے تھے اور فرماتے تھے :تم میں سے کوئی کسی کام کا ارادہ کرے تو یہ دعا کرے: ’’اللهم انی اسخيرك بعلمك الى آخره ‘‘۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم کی رات کی نماز دو دو رکعت ہے اور وتر رات کی آخری رکعت ہے۔

حضرت ابن عمر رضی اللہ عنہما فرماتے ہیں کہ حضورصلی اللہ علیہ وسلم نے دباء‘ خنتم (سبز لا کھی گھڑا)‘نقیر (چوبیں برتن )‘مزفت (رال ملے ہوئے برتن) میں نبیذ بنانے سے منع فرمایا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم صدقہ فطر ایک صاع کھجور یا ایک صاع جَو کا نکالتے تھے۔

حضرت ابن عمر رضی اللہ عنہما فرماتے ہیں کہ میں نے حضور صلی اللہ علیہ وسلم کو فرماتے ہوئے سنا ‘آپ نے فرمایا: جو مال کی حفاظت کرتے ہوئے مارا جائے ‘وہ شہید ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم جب نماز شروع کرتے تو دونوں ہاتھ اُٹھاتے اور تکبیر کہتے ‘دونوں ہاتھ کان کی لو کے برابر کرتے ‘جب رکوع کرتے تو تکبیر کہتے‘پھر سمع اللہ لمن حمدہ کہتے تو اس طرح کرتے ‘پھر ربنا لک الحمد پڑھتے جس وقت سجدہ کرتے تو ایسے نہ کرتے اور نہ سجدہ سے اُٹھتے وقت۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: آگ سے پکی ہوئی شی کھانے کے بعد وضو کر و‘ یعنی کُلّی و غیره کرو۔

حضرت ابن عمر رضی اللہ عنہما فرماتے ہیں کہ میں نے رسول الله صلی اللہ علیہ وسلم کو فرماتے ہوئے سنا: جب کوئی آدمی دوسرے آدمی کی طرف جاتا ہے اُسے قتل کرنے کے لیے تو مقتول جنت میں اور قاتل جہنم میں ہوگا۔

حضرت ابن عمر رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: تم میں سے جب کسی کی ہوا خارج ہو تو وہ وضو کرے۔