Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم گم شدہ شی کے متعلق یہ دعا کرتے : ’’اللهم راد الضالة الى آخره ‘‘۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: بے شک اہل جنت کی بیویاں خوبصورت آواز میں اپنے خاوندوں کو گانے سنائیں گی‘ جتنی خوبصورت آواز انہوں نے کبھی نہ سنی ہوگی اور وہ اس طرح گائیں گی :ہم خوبصورت چہروں والی ‘بھلائی اور احسان کرنے والی ہیں ‘ایسے لوگوں کی بیویاں ہیں جو عزت والے ہیں‘جو دیکھتے ہیں تو ان کی آنکھیں ٹھنڈی ہوتی ہیں۔ نیز وہ جو گائیں گی یہ ہوگا: ہم ہمیشہ رہنے والی ہیں‘ ہم نہیں مریں گی‘ ہم امن والی ہیں‘ہمیں خوف نہیں ہے‘ہم رہنے والی ہیں ‘سفر کرنے والی نہیں ہیں۔

حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وسلم نے اپنے صحابہ میں سے ایک آدمی سے حال پوچھا: کیا تُو نے آج مریض کی عیادت کی؟ اس نے عرض کی نہیں! فرمایا: کچھ صدقہ کیا؟ عرض کی : نہیں ! فرمایا: کیا کسی میت پر نمازِ جنازہ پڑھی؟ عرض کی: نہیں! فرمایا: اپنی بیوی کے حقوق ادا کیے؟ عرض کی: نہیں! فرمایا: تیرا اپنی بیوی کے پاس جانا بھی تیری طرف سے صدقہ ہے اور وہ جمعہ کا دن تھا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: حلال اور حرام واضح ہیں‘جوشی شک میں ڈالے اسے چھوڑ دے۔

حضرت عبداللہ بن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: بے شک اللہ تعالی ٰعلم کو لوگوں کے سینوں سے نہیں نکالے گا بلکہ علماء کے فوت ہو جانے سے علم قبض ہو گا ‘یہاں تک کہ جب کوئی عالم باقی نہیں رہ جائے گا تو لوگ جاہلوں کو اپنا سردار بنالیں گے‘ پس ان سے سوال کیا جائے گا تو وہ فتوے جاری کر کے خود بھی گمراہ ہوں گے اور لوگوں کو بھی گمراہ کریں گے۔

حضرت عبداللہ بن عمر رضی اللہ عنہما سے مروی ہے کہ ا نبی کریم صلی اللہ علیہ وسلم نے ہوا خارج ہونے پر ہنسنے کے بارے میں نصیحت فرمائی ۔ فرمایا: تم میں سے کوئی ایک کسی ایسی چیز پر ہنستا ہے جو وہ کرتا ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا قسم یا تو توڑنی ہے یا ندامت ہے۔

حضرت عبداللہ بن عمر رضی اللہ عنہما نے ایک دن فرمایاکہ رسول کریم صلی اللہ علیہ وسلم نے فرمایا: عورتوں کو مسجدوں سے مستفید ہونے سے مت روکو۔ میں (یعنی بلال بن عبد اللہ ) نے عرض کی :لیکن میں تو اپنی بیوی کو روکوں گا‘ پس جو چاہے وہ اپنی بیوی کو روک لے۔ پس میرے والد گرامی نے میری طرف متوجہ ہو کر فرمایا: اللہ تجھ پر لعنت کرے! تین بار فرمایا ‘تُو مجھ سے سن بھی رہا ہے کہ رسول کریم صلی اللہ علیہ وسلم نے حکم دیا کہ ان کو نہ روکا جائے ‘اور تُو کہتا ہے کہ میں اپنی بیوی کو ضرور روکوں گا۔ پھر رونا شروع کر دیا اور کھڑے ہوئے اس حال میں کہ انتہائی غصے میں تھے۔

حضرت عبداللہ بن عمر رضی اللہ عنہما فرماتے ہیں کہ رسول کریم صلی اللہ علیہ وسلم ہمارے پاس تشریف لائے جبکہ ہم فجر کے بعد نماز پڑھ رہے تھے‘ فرمایا: فجر طلوع ہونے کے بعد ( فرض نماز سے پہلے ) صرف دورکعت (سنت) ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جس کسی آدمی کا کھجور کا درخت پھلدار ہو پھر اس کو فروخت کرے تو پھل بائع کا ہے اور مشتری اگر شرط لگائے تو ٹھیک ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو کتا شکار اور حفاظت کے علاوہ رکھے تو اس کے ثواب میں ہر روز دو قیراط کمی آئے گی اور ہم کو حکم دیا گیا کہ کتے تلاش کر کے قتل کر دیں ‘مدینہ میں جہاں بھی انہیں پائیں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: مسلمان پر حق ہے کہ ایک رات یا دو دن اس حالت میں نہ گزارے کہ وصیت اس کے پاس لکھی ہوئی نہ ہو۔