Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ مجھےمیرے خالو حضرت عثمان بن مظعون نے مجھے لحاف لانے کیلئے بھیجا‘ پس میں نے حاضر ہو کر نبی کریم صلی اللہ علیہ وسلم سے اجازت طلب کی اس حال میں کہ آپ خندق کے مقام پر تھے تو آپ صلی اللہ علیہ وسلم نے مجھے اجازت دے دی اور فرمایا: راستے میں جو بھی تجھے ملے اسے کہنا کہ رسول کریم صلی اللہ علیہ وسلم نے تمہیں واپس لوٹ جانے کا حکم دیا ہے حالانکہ سخت سردی تھی۔ پس میں نکلا تو لوگ مجھے ملنے لگے ‘میں نے کہا: رسول کریم صلی اللہ علیہ وسلم نے تمہیں واپس لوٹ جانے کا حکم فرمایا ہے۔ فرماتے ہیں: قسم بخدا! کوئی دو یا ایک آدمی کے سوا کسی نے میری طرف توجہ نہ کی۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم کے زمانہ میں ایک لشکر کو کھانا اور شہد مالِ غنیمت کے طور پر ملا ‘ان سے آپ نے خمس نہیں لیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اللہ عزوجل عزیمت پر عمل کرنے پر وہ دیتا ہے جس طرح کہ نا فرمانی کو نا پسند کرتا ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: آخر زمانہ میں کچھ ایسے لوگ پیدا ہوں گے جو تقدیر کا انکار کریں گے‘ وہ اس امت کے مجوسی ہیں‘ اگر یہ بیمار ہو جائیں تو ان کی عیادت نہ کرو ‘اگر مر جائیں تو ان کے جنازہ میں شرکت نہ کرو۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو کسی آزمائش والے کو دیکھے تو یہ دعا کرے: ’’الحمد لله الذي عافاني الى آخره ‘‘۔

حضرت میمون بن مہران فرماتے ہیں کہ میں نے حضرت ابن عمر رضی اللہ عنہما کو فرماتے ہوئے سنا: تحقیق ہم نے ایک غزوہ میں خود کو روحاء کی گھاٹی میں پایا جو غزوہ رسول کریم صلی اللہ علیہ وسلم نے کیا۔ پس مجھے حضرت عمر رضی اللہ عنہ نے دیکھا تو مجھے بہت ساری دعائیں دیں‘ وہ دعائیں مجھے دنیا و مافیہا کی دیگر چیزوں سے زیادہ خوش کرتی ہیں۔

حضرت ابن عمر رضی اللہ عنہما فرماتے ہیں کہ حضرت عائشہ اور حضرت حفصہ رضی اللہ عنہما نے روزے کی حالت میں صبح کی ‘اس کے بعد انہیں کچھ کھانا تحفہ دیا گیا تو ان دونوں نے افطار کر دیا ۔ نبی کریم صلی اللہ علیہ وسلم تشریف لائے تو ان دونوں میں سے ایک نے آپ صلی اللہ علیہ وسلم سے پوچھا تو آپ صلی اللہ علیہ وسلم نے فرمایا: اس کی جگہ ایک دن کا روزہ رکھ لینا۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: تمہارے جاگنے میں سے زیادہ مقبول وہ ہے جو تم آخری عشرہ میں کرتے ہو یعنی شب ِقدر ‘پس جب تم میں سے کوئی اسے تلاش کرنے والا ہو تو اسے آخری دس دنوں میں تلاش کرے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم سے جمعہ کے دن غسل کرنے کے متعلق پوچھا گیا تو آپ نے فرمایا :غسل کرو۔

حضرت نافع فرماتے ہیں کہ حضرت ابن عمر رضی اللہ عنہما جب حجر اسود کو استلام کرنے کا ارادہ کرتے تو یہ دعا کرتے ’’ اللهم ايمانا بك الى آخره ‘‘ پھر حضور صلی اللہ علیہ وسلم پر درود پڑھتے اور استلام کرتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے حضرت نجاشی کی نمازِ جنازہ پڑھائی‘آپ نے ان کے جنازہ میں چار تکبیریں کہیں۔

حضرت ابن عمر رضی اللہ عنہما روایت فرماتے ہیں کہ نبی کریم صلی اللہ علیہ وسلم نے منع فرمایا کہ آگے جا کر کوئی تاجر سامان حاصل کرے جب تک سامان بازار (منڈی) میں نہ آ جائے۔