Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ ایک آدمی نے نبی کریم صلی اللہ علیہ وسلم کی خدمت میں حاضر ہو کر عرض کی: محرم کیا پہن سکتا ہے؟ فرمایا: محرم قمیص‘ عمامہ ‘ٹوپی‘ پاجامہ اور موزے نہیں پہن سکتا ہے مگر وہ جوتے نہ پائے تو موزے پہن سکتا ہے لیکن ان کو ٹخنوں کے اوپر سے کاٹ دے اور زعفران وورس سے رنگے ہوئے کپڑے بھی نہ پہنے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فجر کے بعد سواری پر سیدھے بیٹھ کر احرام باندھا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم جب تلبیہ پڑھتے تھے تو اس طرح پڑھتے: ’’لبيك اللهم لبيك الى آخره ‘‘ ۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم جب تلبیہ پڑھتے تھے تو اس طرح پڑھتے: ’’لبيك اللهم لبيك الى آخره ‘‘۔

حضرت ابن عمر رضی اللہ عنہما فرماتے ہیں کہ حضورصلی اللہ علیہ وسلم سے پوچھا گیا کہ کون سا حج افضل ہے؟ آپ نے فرمایا: وہ حج جس میں تلبیہ بلند آواز سے پڑھا جائے اور آب ِزم زم خوب پیا جائے۔

حضرت ابن عمر رضی اللہ عنہما فرماتے ہیں کہ میں نےحضور صلی اللہ علیہ وسلم کو فرماتے ہوئے سنا: دورکنوں کو چھونا گناہوں کو معاف کروانے کا ذریعہ ہے۔

حضرت کثیر بن جمہان فرماتے ہیں کہ ایک آدمی حضرت ابن عمر رضی اللہ عنہما کی خدمت میں آیا اس حال میں کہ آپ وادی میں چل رہے تھے ‘اس نے عرض کی: اے ابن عمر ! آپ ہمیں حکم دیتے ہیں کہ دوڑو اور آپ خود چل رہے ہیں؟ فرمایا : اگر میں چلا ہوں تو میں نے رسول کریم صلی اللہ علیہ وسلم کو چلتے ہوئے دیکھا ہے اور اگر کسی جگہ میں نے دوڑ لگائی تو میں نے رسول کریم صلی اللہ علیہ وسلم کو دوڑتے ہوئے دیکھا ‘حالانکہ میں بوڑھا آدمی ہوں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: درختوں میں ایک درخت ہے جس کی مثال مسلمان آدمی کی طرح ہے ‘وہ کھجور کا درخت ہے۔

حضرت ابن عمر رضی اللہ عنہما فرماتے ہیں: ہم صدقہ فطر کھجور سے ایک صاع دیتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اپنے دوست سے ایک حد تک ہلکی پھلکی محبت کر ‘ممکن ہے کہ ایک دن وہی تیرا دشمن ہو اور دشمن سے ہلکی نفرت کر ممکن ہے کہ ایک دن وہی تیرا دوست ہو۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا : جو آدمی ایک نماز پڑھنا بھول گیا ‘پس اسے وہ نماز اس وقت یاد آئی جب وہ امام کے ساتھ تھا تو اپنی نماز کو (امام کے ساتھ ) مکمل کرے‘ اس کے بعد قضا نماز پڑھے پھر وہ نماز لوٹائے جو اس نے امام کے ساتھ پڑھی۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: بچہ باپ کی کمائی ہے۔