Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جس کو ولیمہ کی دعوت دی جائے ‘وہ ولیمہ پر نہ آئے تو اُس نے اللہ اور اس کے رسول کی نافرمانی کی۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے عورتوں اور بچوں کو مارنے سے منع فرمایا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے ولاء کو فروخت کرنے اور ہبہ کرنے سے منع فرمایا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: ہر نشہ آورشی شراب ہے ‘ہر شراب حرام ہے ‘وہ تھوڑا نشہ دے یا زیادہ دے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: سفر میں روزہ رکھنا نیکی نہیں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: لوگ ایسے سو اونٹ کی طرح ہیں ‘جن میں سواری کے قابل ایک بھی نہیں ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم جمعہ کے بعد دو رکعت ادا کرتے تھے۔

حضرت عبدالجبار بن مری اپنے والد سے روایت کرتے ہیں کہ ایک آدمی حضرت ابن عمر رضی اللہ عنہما کے پاس آیا ‘اُس نے آپ سے سوال کیا تو آپ نے اس کی طرف اپنا عمامہ پھینک دیا‘ بعض لوگوں نے آپ سے عرض کی: اگر آپ ایک درہم دے دیتے تو کافی ہوتا۔ پس حضرت ابن عمر رضی اللہ عنہما نے فرمایا کہ میں نے رسول کریم صلی اللہ علیہ وسلم کو فرماتے ہوئے سنا: بے شک یہ بات بھی اچھی نیکی ہے کہ آدمی کسی کو وہ چیز دے جو اس کے باپ کی پسند ہو اور یہ حضرت عمر کی پسند تھی۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے حاملہ کے حمل کی بیع کرنے سے منع کیا۔

حضرت ابن عمر رضی اللہ عنہما فرماتے ہیں کہ میں نے اپنی بیوی کو حالتِ حیض میں طلاق دی‘یہ بات رسول اللہ تک پہنچی تو آپ نے رجوع کرنے کا حکم دیا ‘اور طہر میں جماع کرنے کا حکم دیا ‘جب پاک ہو جائے تب تم چاہو تو طلاق دو چاہے تو روک لو۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جس نے شراب پی یا ریشم پہنا اُس کا ہم سے کوئی تعلق نہیں‘ جو عورت اپنے شوہر سے ناراض ہو یا غلام اپنے آقا ہے تو اس کا ہم سے کوئی تعلق نہیں ۔

حضرت ابن عمر رضی اللہ عنہما سے مروی ہے کہ ایک آدمی حضرت عمر رضی اللہ عنہ کی خدمت میں آیا عرض کی:میں نے اپنی بیوی کو پکی طلاق دے دی ہے جبکہ وہ حالت حیض میں ہے۔ پس حضرت عمر رضی اللہ عنہ نے فرمایا: تُو نے اللہ کی نافرمانی کی ہے اور اپنی بیوی کو کھو دیا ہے۔ پس آدمی نے عرض کی : بے شک رسول کریم صلی اللہ علیہ وسلم نے حضرت. ابن عمر رضی اللہ عنہما کو رجوع کا حکم دیا تھا جب انہوں نے اپنی بیوی کو جدا کیا۔ حضرت عمر رضی اللہ عنہ نے اس سے فرمایا: بے شک رسول کریم صلی اللہ علیہ وسلم نے اسے اس طلاق کی وجہ سے رجوع کا حکم فرمایا تھا جو باقی تھا اور تیرے لیے تو کوئی طلاق ہی باقی نہیں رہ گئی جس کے ساتھ تُو رجوع کر سکے۔