Al Muajam Al Kabir Tibrani

حضرت ابن عمر رضی اللہ عنہ فرماتے ہیں کہ حضور صلی اللہ علیہ وسلم نے فرمایا: اللہ عزوجل کو جب کوئی شی سپرد کی جائے وہ ادا کرتا ہے۔ حضرت لقمان علیہ السلام نے اپنے بیٹے سے فرمایا تھا: تو اپنے دین اور امانت اور اپنے اعمال کےخوا تم کو اللہ کے سپرد کر دے۔

حضرت ابن عمر رضی اللہ عنہ فرماتے ہیں کہ حضور صلی اللہ علیہ وسلم نے فرمایا: ساری مکھیاں جہنم میں جائیں گی سوائے شہد کی مکھی کے۔ حضور صلی اللہ علیہ وسلم نے مکھیوں کو مارنے اور کھانے کو جلانے سے منع فرمایا۔ حضرت سفیان نے فرمایا: شبہ ہے یہ دشمن کے ملک میں ہو۔

حضرت ابن عمر رضی اللہ عنہما سے مروی ہے کہ حبشہ سے ایک آدمی نبی کریم صلی اللہ علیہ وسلم کے پاس آیا‘ اس نے عرض کی: اے اللہ کے رسول ! آپ لوگوں کو رنگوں اور نبوت کے سبب ہم لوگوں پر فضیلت دی گئی‘ آپ کا کیا خیال ہے کہ اگر میں ایسے ایمان لے آؤں جیسے آپ ایمان لائے ہیں اور ایسا علم رکھوں جو آپ کے پاس ہے تو کیا میں آپ کے ساتھ جنت میں ہوں گا؟ نبی کریم صلی اللہ علیہ وسلم نے فرمایا: ہاں! پھر فرمایا: جس نے لا الہ الا اللہ کہا تو اس کے لیے اس کے بدلے اللہ کے پاس وعدہ ہے اور جس نے سبحان اللہ کہا تو اس کے لیے ایک لاکھ نیکی لکھی جائے گی۔ پس (یہ سن کر ) اس نے عرض کی : اے اللہ کے رسول ! اس کے بعد ہم کیسے ہلاک ہو سکتے ہیں؟ پس نبی کریم صلی اللہ علیہ وسلم نے فرمایا: مجھے قسم ہے اس ذات کی جس کے قبضے میں میری جان ہے ! بے شک قیامت کے دن ایک آدمی اتنے اعمال لائے گا کہ اگر انہیں پہاڑ پر رکھا جائے تو وہ بوجھل ہو جائے‘ پس اللہ کی نعمتوں میں سے ایک نعمت اُٹھ کھڑی ہوگی‘ پس ممکن ہے وہ ان تمام نیکیوں کو ختم کر دے ‘ اگر اللہ کی رحمت سے اس کا فضل نہ ہو۔ پھر یہ آیت نازل ہوئی : ’’ هل اتی علی الانسان ‘‘ اللہ کے اس فرمان تک ’’ وملكًا كبيرا ً“۔ پس حبشی بولا : اے اللہ کے رسول! کیا جنت میں میری آنکھیں دیکھ سکیں گی جیسے آپ کی آنکھیں دیکھتی ہیں۔ پس نبی کریم صلی اللہ علیہ وسلم نے فرمایا: ہاں! پس حبشی نے رونا شروع کر دیا یہاں تک کہ اس کی جان بہہ گئی ۔ حضرت ابن عمر رضی اللہ عنہما فرماتے ہیں کہ میں نے نبی کریم صلی اللہ علیہ وسلم کو دیکھا کہ آپ صلی اللہ علیہ وسلم اسے اس کی قبر میں اتار رہے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جس نے گندم خریدی ‘ وہ قبضہ سے پہلے اس کو آگے فروخت نہ کرے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا : مؤمن ایک آنت میں کھاتا ہے اور کافر سات آنتوں میں کھاتا ہے۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا : گزری ہوئی اُمتوں کی مدتوں سے تمہاری مدت کی مثال ایسے ہے جیسے عصر کی نماز سے مغرب کی نماز تک کا وقت ہے ‘ بے شک تمہاری اور یہود و نصاری ٰ کی مثال ایسے ہے جیسے ایک آدمی نے کچھ لوگ کام پر لگائے تو اس نے کہا: کون ہے جو میرے لیے آدھا دن کام کرے ‘ تو میں اسے ایک قیراط دوں گا ‘ ایک ایک قیراط پر یہودیوں نے آدھا دن کام کیا‘ نیز ایک ایک قیراط پر نصف النہار سے عصر تک عیسائیوں نے کام کیا۔ پھر اس نے کہا: عصر سے مغرب تک کون کام کرے گا ‘ میں اسے دو دو قیراط دوں گا؟ خبردار! تمہارے لیے دو بار اجر ہے۔ پس یہودیوں اور عیسائیوں کو غصہ آیا تو انہوں نے کہا: ہم نے کام زیادہ کیا لیکن ہمارا معاوضہ کم ہے (ان کا کام تھوڑا لیکن معاوضہ زیادہ ہے )۔ پس اس آدمی نے کہا: کیا میں نے تمہارے حق ( جو مقرر ہوا) میں کوئی کمی کی ہے؟ انہوں نے کہا: نہیں ! اس نے کہا: یہ میری مہربانی ہے جس کو میں چاہوں عطا کروں۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم کے سامنے مجوسیوں کا ذکر ہوا تو آپ صلی اللہ علیہ وسلم نے فرمایا: وہ اپنے کپڑے زمین پر گھسیٹتے ہیں اور اپنی داڑھیاں منڈواتے ہیں‘ پس تم ان کی مخالفت کرو۔ پس حضرت ابن عمر رضی اللہ عنہما اپنے کپڑے کو بہت سنبھالتے تھے ‘ پس وہ اسے کاٹا کرتے جیسے بکری کے بالوں کو کاٹتے ۔

حضرت ابن عمر رضی اللہ عنہما فرماتے ہیں کہ میں نے اپنی بیوی کو حالت حیض میں طلاق دے دی ‘ یہ بات حضرت عمر رضی اللہ عنہ نے حضور صلی اللہ علیہ وسلم کو بتائی تو حضور صلی اللہ علیہ وسلم نے فرمایا: وہ عورت دوبارہ عبداللہ کے حوالہ کر دو ‘ جب پاک ہوئی تو آپ نے فرمایا: اگر تو چاہے تو طلاق دے ‘ اگر تو چاہے تو طلاق نہ دے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم چٹائی پر نماز پڑھتے تھے۔

حضرت ابن عمر رضی اللہ عنہما فرماتے ہیں کہ غیلان بن سلمہ کے نکاح میں دس بیویاں تھیں‘ غیلان مسلمان ہوا تو حضور صلی اللہ علیہ وسلم نے اسے حکم دیا کہ چار بیویوں کا انتخاب کرلو۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: دو آدمی آپس میں سرگوشی نہ کریں تیسرے کو چھوڑ کر۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: میری اُمت کی فنا ء طعن اور طاعون میں ہے۔ ہم نے عرض کی: طعن کو تو ہم نے جان لیا ‘ طاعون کیا ہے؟ فرمایا: تمہارے دشمن جنوں کی سزاؤں میں سے باقی سزا ہے ‘ لیکن ہر ایک میں شہادت ہے۔