Al Muajam Al Kabir Tibrani

حضرت میمون بن مہران فرماتے ہیں کہ ایک آدمی حضرت ابن عمر رضی اللہ عنہما کے پاس آیا ‘ اور اس نے آیت کے بارے دریافت کیا: ” ان سے لڑو یہاں تک کہ فتنے نہ رہیں ‘‘ حضرت ابن عمر رضی اللہ عنہما نے فرمایا: ہم حضور صلی اللہ علیہ وسلم کے ساتھ مل کر لڑتے تھے یہاں تک کہ فتنہ نہیں رہتا تھا‘ پس آپ اور آپ کے ساتھی جاؤ اور جا کر جہاد کرو یہاں تک کہ فتنہ نہ رہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے جو تہبند کے متعلق فرمایا ‘ وہی حکم قمیص کے متعلق ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو سلام کرنے سے پہلے سوال کرے ‘ اس کو جواب نہ دو۔

حضرت ابن عمر رضی اللہ عنہما فرماتے ہیں کہ میں نے رسول کریم صلی اللہ علیہ وسلم کو فرماتے ہوئے سنا: جب قیامت کا دن ہوگا تو اللہ تعالیٰ اپنے بندوں میں سے ایک بندے کو بلا کر اپنے سامنے کھڑا فرمائے گا ‘ پس اس سے اس کے مقام و مرتبہ (عہدہ) کے حوالے سے اسی طرح سوال کرے گا جس طرح اس کے مال کے بارے میں پوچھے گا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جب تین آدمی ہوں تو دو آپس میں سرگوشی نہ کریں‘ ایک کو چھوڑ کر۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم کی عادت تھی کہ جب ہوا یا بارش کی رات ہوتی تو موذن نماز عشاء کی اطلاع کے لیے آتا تو آپ اس کو حکم دیتے کہ اذان دینے کے بعد اعلان کرو کہ گھروں میں نماز پڑھ لو۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم داخل ہوئے‘ ہم آپ کے ساتھ بنی عبد مناف کے دروازے سے داخل ہوئے‘ لوگ اس کا نام باب بنی شیبہ رکھتے ہیں‘ ہم آپ کے ساتھ باب حزورہ سے مدینہ کی طرف نکلے اور یہی باب الخیاطین ہے۔

حضرت ابن عمر رضی اللہ عنہما سے مروی ہے کہ رسول کریم صلی اللہ علیہ وسلم نے فرمایا: بے شک تمہاری مدت پہلی گزری ہوئی اُمتوں میں اسی طرح ہے جس طرح عصر سے مغرب کی نماز کا وقت ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: محرم سے نکاح نہ کیا جائے‘ کسی کے نکاح کے پیغام پر پیغام نہ بھیجا جائے اپنے بھائی کی بیع پر بیع نہ کی جائے۔

حضرت ابن عمر رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: عورت جو اپنے گھر سے نکلتی ہے اس حالت میں کہ اس کا شوہر اس سے ناراض ہوتا ہے ‘ تو آسمان سے ہر فرشتہ اور ہرشی جس کے پاس سے گزرتی ہے سوائے جن اور انسان کے ‘ لعنت کرتے ہیں واپس آنے تک۔

حضرت ابن عمر رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: تم میں سے جو جمعہ کے لیے آئے ‘ وہ غسل کرے۔

حضرت مجاہد فرماتے ہیں کہ ایک آدمی حضرت ابن عمر رضی اللہ عنہما کے پاس آیا اور عرض کی : آپ حضرت علی رضی اللہ عنہ کے متعلق کیا فرماتے ہیں؟ آپ نے فرمایا: آپ گھر والے ہیں ۔اس نے عرض کی : آپ حضرت عثمان رضی اللہ عنہ کے متعلق کیا فرماتے ہیں؟ حضرت ابن عمر رضی اللہ عنہما نے فرمایا: میں ایسے آدمی کے گناہ کے متعلق کیا کہوں جو اس کے اور اللہ کے درمیان ہے ‘ اللہ نے معاف کر دیا ‘ جو گناہ تمہارے اور ان کے درمیان ہے ‘ اس کی وجہ سے تم نے آپ کو قتل کیا۔