Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ میں نے حضرت بلال رضی اللہ عنہ کو خوشخبری دی‘ حضرت بلال رضی اللہ عنہ نے مجھے کہا: اے عبداللہ ! آپ مجھے کس کی خوشخبری دے رہے ہیں؟ میں نے کہا: میں نے رسول اللہ صلی اللہ علیہ وسلم کو فرماتے ہوئے سنا: بلال قیامت کے دن اپنی سواری پر رہے گا‘ جس کا کجاوا سونے کا ہوگا اور لگام موتی اور یاقوت کی ہو گی ‘ اس کے ساتھ جھنڈا ہوگا ‘ جتنے موذن ہوں گے اس کے ساتھ ہوں گے ‘ سب جنت میں داخل ہوں گے یہاں تک کہ جس نے چالیس دن فجر کی اذان دی ہو گی اللہ عز و جل کی رضا کے لیے (وہ بھی)۔

حضرت ابن عمر رضی اللہ عنہما مرفوعاً روایت کرتے ہیں کہ حضور صلی اللہ علیہ وسلم نے فرمایا : جو اس طرح عاجزی کرے ‘ آپ نے اپنی ہتھیلی کے باطن کے ساتھ زمین کی طرف اشارہ کیا اور اس کو اس طرح بند کیا‘ آپ نے اپنی ہتھیلی کے باطن کے ساتھ آسمان کی طرف اشارہ کیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: ہر امت کے کچھ لوگ جنت اور کچھ جہنم میں ہوں گے سوائے میری اُمت کے کہ وہ سارے کے سارے جنت میں داخل ہوں گے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو ریشم پہنے اور چاندی کے برتن میں پئے اُس کا تعلق ہم سے نہیں‘ جو عورت اپنے شوہر سے یا غلام اپنے آقا سے ناراض ہو ‘ اُس کا ہم سے کوئی تعلق نہیں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اگر اللہ جنت والوں کو تجارت کی اجازت دے تو وہ گندم اور خوشبو کی تجارت کریں گے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم سفر میں ( نفل نماز ) سواری پر ادا کرتے تھے اور اشارہ سے پڑھتے تھے اور سجدہ میں رکوع سے زیادہ جھکتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: میں مذاق بھی حق کرتا ہوں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: دو آدمی آپس میں سرگوشی نہ کریں تیسرے کو چھوڑ کر۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: باجماعت نماز پڑھنا زیادہ افضل ہے ‘ ستائیس درجے اکیلے نماز پڑھنے سے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: دو بیع کرنے والوں کو اختیار ہے یہاں تک کہ دونوں جدا ہوں‘ سوائے بیع خیار کے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم مقام تحقیق پر نماز قصر کرتے ہیں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: بندہ جب جھوٹ بولتا ہے تو جھوٹ کی بدبو سے فرشتہ اتنی دور چلا جاتا ہے یہاں تک کہ اس کی بدبو ختم ہو جائے۔