Al Muajam Al Kabir Tibrani

حضرت عبد اللہ بن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: میرا حوض ‘ایک ماہ کی مسافت ہے ‘اس کے چاروں کونے برابر ہیں‘ اس کا پانی سفید چاندی کی طرح ہے ‘اس کی خوشبو کستوری سے زیادہ پاکیزہ ہے اور اس کے آفتا بے آسمان کے تاروں کی تعداد کے برابر ہیں‘ جس نے اس سے پیاوہ کبھی پیاسا نہ ہوگا۔

حضرت عبداللہ بن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اللہ عز وجل ان مردوں کو نا پسند کرتا ہے جو منہ پھاڑ کر گفتگو کرتے ہیں‘جس طرح کہ زبان کھول کھول کر باتیں کرتے ہیں۔

حضرت نافع سے مروی ہے کہ ایک آدمی نے حضرت عبد اللہ بن عمر رضی اللہ عنہما سے سوال کیا کہ میرا خالو ہے جس نے اپنی بیوی کو جدا کر دیا ہے ‘پس اس وجہ سے وہ غمگین ہے اور معاملہ اس پر نا قابل ِبرداشت ہے ‘پس میں نے ارادہ کیا ہے کہ اس سے نکاح کرلوں حالانکہ اس نے مجھے اس بات کا حکم نہیں دیا ہے اور نہ ہی اسے اس بات کا علم ہے؟ ( پھر وہ اس کیلئے حلال ہو جائے اور وہ اس سے نکاح کرلے ) آپ نے فرمایا: نہیں ! مگر تُو اس کے ساتھ نکاح کرے ‘اگر وہ تیرے ساتھ موافقت کرے تو تُو اسے اپنے پاس روک لے اور اگر وہ نا پسند کرے تو تُو اسے جدا کر دے کیونکہ رسول کریم صلی اللہ علیہ وسلم کے زمانے میں ہم اسے زنا شمار کیا کرتے تھے۔

حضرت ابن عمر رضی اللہ عنہما فرماتے ہیں کہ میں نے رسول الله صلی اللہ علیہ وسلم کو فرماتے ہوئے سنا: جس نے بیعت کی پھر توڑ دی ‘وہ اللہ عز و جل سے قیامت کے دن ملے گا اس حالت میں کہ اس کے پاس اس کا دایاں ہاتھ نہیں ہوگا۔

حضرت نافع فرماتے ہیں: حضرت ابن عمر رضی اللہ عنہما ایک آدمی کے پاس سے گزرے جو نماز پڑھ رہا تھا ‘ اس نے بایاں ہاتھ نماز میں اپنی دونوں آنکھوں پر رکھا ہوا تھا تو آپ نے اس سے فرمایا: بے شک رسول کریم صلی اللہ علیہ وسلم نے فرمایا: اس قوم کی مانند مت بیٹھو جو غائب ہے۔

حضرت عبد اللہ بن عمر رضی اللہ عنہما فرماتے ہیں کہ حضور صلی اللہ علیہ وسلم حجتہ الوداع کے موقع پر نحر کے دن جمرات کےپاس ٹھہرے اور فرمایا: یہ حج اکبر کا دن ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اللہ کے بندوں میں سے ایک نے عرض کی : اے رب! تیرے لیے حمد ہے ‘جیسے چاہیے تیرے چہرے کے جلال اور تیری بادشاہی کے بڑا ہونے کی وجہ سے۔ پس دو فرشتوں نے اسے مضبوطی سے پکڑا اور آسمان ِدنیا پر لے گئے ۔ عرض کی: اے رب! تیرے بندے نےایسا کلام کیا ہے کہ ہم نہیں جانتے کہ اس کا ثواب کیسے لکھیں۔

حضرت سالم بن عبداللہ سے مروی ہے کہ حضرت عبداللہ بن عمر رضی اللہ عنہما سے میں نے سنا کہ آپ فرما رہے تھے رسول کریم صلی اللہ علیہ وسلم ابن صیاد کے پاس سے گزرے اس حال میں کہ وہ بچوں کے ساتھ کھیل رہا تھا ‘پس آپ صلی اللہ علیہ وسلم نے اسے پہچان لیا‘اسے آگے بلا کر فرمایا: کیا تُو گواہی دیتا ہے کہ میں اللہ کا رسول ہوں؟ ابن صیاد نے جواب دیا: میں گواہی دیتا ہوں کہ آپ نبی امیین ہیں ‘پس آپ گواہی دیتے ہیں کہ میں اللہ کا رسول ہوں؟ پس رسول کریم صلی اللہ علیہ وسلم نے فرمایا: میں ایمان لایا اللہ اور اس کےرسول پر۔

حضرت ابن عمر رضی اللہ عنہما فرماتے ہیں کہ میں نے رسول الله صلی اللہ علیہ وسلم کو فرماتے ہوئے سنا: جو تم میں سے کھائے وہ دائیں ہاتھ سے کھائے اور پئے تو دائیں ہاتھ سے پئے کیونکہ شیطان بائیں ہاتھ سے کھاتا اور پیتا ہے۔

حضرت عبداللہ بن عمر رضی اللہ عنہما فرماتے ہیں کہ حضور صلی اللہ علیہ وسلم ایک جہاد کیلئے نکلے ‘تو فرمایا: آج کے دن وہ آدمی ہمارے ساتھ نہ جائے جس نے اپنے پڑوسی کو تکلیف دی ہو ‘پس قوم میں سے ایک آدمی نے عرض کی: میں نے اپنے پڑوسی کے باغ کی جڑوں میں پیشاب کیا ہے؟ فرمایا: آج کے دن تُو بھی ہماری صحبت اختیار نہیں کر سکتا۔

حضرت عبداللہ بن عمر رضی اللہ عنہما فرماتے ہیں کہ حضور صلی اللہ علیہ وسلم یہ دعا کرتے تھے : ’’اللهم انى اعوذ بك الى آخره “۔

حضرت عبداللہ بن عمر رضی اللہ عنہما فرماتے ہیں کہ حضور صلی اللہ علیہ وسلم نے حضرت عثمان رضی اللہ عنہ کیلئے مالِ غنیمت کا حصہ دیا ‘بدر کے دن حالا نکہ آپ رضی اللہ عنہ بدر میں شریک نہیں ہوئے تھے۔