Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ ایک آدمی کی نئی شادی ہوئی تھی‘ حضور صلی اللہ علیہ وسلم نے ایک لشکر کو ایک جہاد کے لیے بھیجا ‘ ان میں وہ آدمی بھی تھا‘ جب لوگ آئے ‘ وہ جلدی اپنے گھر آیا تو اس کی بیوی دروازہ پر کھڑی تھی ‘ اس کو غیرت آئی اُس نے مارنے کیلئے تیر پکڑا ‘ اس کی بیوی نے کہا: جلدی نہ کر ‘ گھر میں دیکھ۔ وہ گھر میں داخل ہوا تو بستر سے لپٹا ہوا ایک سانپ تھا‘ اُس نے سانپ کو مارا وہ سانپ بھی مر گیا اور آدمی بھی مر گیا۔ یہ بات حضور صلی اللہ علیہ وسلم تک پہنچی تو آپ نے فرمایا: یہ جنوں میں سے گھروں میں رہنے والے جن ہیں اور جنوں کو مارنے سے منع کیا گیا ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے جنوں کو مارنے سے منع کیا ہے ‘ جو گھر میں ( سانپ کی شکل) ہوتے ہیں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: طلاق ‘ نکاح کے بعد ہی ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: میں ایسے درخت کو جانتا ہوں جو مؤمن کی طرح ہے ‘ میں نے دل میں کہا کہ وہ کھجور ہے ‘ لیکن میں قوم میں چھوٹا تھا ‘ ( اس لیے خاموش رہا) حضور صلی اللہ علیہ وسلم نے فرمایا: وہ کھجور ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے دعا کی: اے اللہ ! میری اُمت کے صبح کے کاموں میں برکت رکھ دے۔

حضرت ابن عمر رضی اللہ عنہما روایت کرتے ہیں کہ حضور صلی اللہ علیہ وسلم سے رات کی نماز کے متعلق پوچھا گیا آپ نے فرمایا: دو دو رکعت ‘ جب تم میں سے کسی کو صبح ہونے کا خدشہ ہو تو ایک رکعت کے ساتھ وتر کر لو۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: افضل ایمان یہ ہے کہ لوگ تجھ سے محفوظ رہیں اور افضل اسلام یہ ہے کہ لوگ تیری زبان اور ہاتھ سے محفوظ ہوں‘ افضل ہجرت یہ ہے کہ گناہوں سے بچا جائے اور افضل جہاد یہ ہے کہ لڑے اور اپنے گھوڑے کی کونچیں کاٹ دے۔

حضرت نافع فرماتے ہیں کہ میں حضرت ابن عمر رضی اللہ عنہما کے پیچھے سوار تھا‘ جب آپ رضی اللہ عنہ ایک چرواہے کے پاس سے گزرے جو مزامیر بجا رہا تھا‘ پس آپ نے اپنی اونٹنی کے منہ پر مار کر اسے راستے سے پھیر دیا اور اپنی انگلیاں اپنے کانوں میں ڈال لیں‘ اس وقت آپ فرما رہے تھے: کیا تم سن رہے ہو؟ (اسی حال پر رہے یہاں تک کہ آواز آنا بند ہو گئی‘ میں نے عرض کیا: میں نہیں سن رہا ہوں۔ پس آپ نے اپنی سواری کو راستے کی طرف لوٹایا۔ فرمایا: اسی طرح کرتے ہوئے میں نے رسول کریم صلی اللہ علیہ وسلم کو دیکھا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: رات کی نماز دو دو رکعت ہے ‘ جب صبح ہونے کا خدشہ ہو تو ایک رکعت ساتھ ملا کر وتر کر لو۔

حضرت ابن عمر رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: جب قیامت کا دن ہوگا تو اللہ عزوجل اپنے بندوں میں سے ایک بندہ کو بلائے گا ‘ اس کو اپنے سامنے کھڑا کرے گا ‘ اس سے اس کی عزت کے متعلق پوچھا جائے گا ‘ جس طرح اس کے مال کے متعلق پوچھا جائے گا۔

حضرت ابن عمر رضی اللہ عنہا فرماتے ہیں کہ حضور صلی اللہ علیہ وسلم نے فرمایا: ماں کا ذبح بچہ کا ذبح ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: رات اور دن کی نماز دو دو رکعت ہے۔