Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اللہ کے کچھ بندے ایسے ہیں کہ ان کو بندوں کے نفع کیلئے خاص کیا گیا ہے ‘جو خرچ کرتے ہیں‘ ان کو اس میں سے دیا جاتا ہے ‘جو منع کرتے ہیں ان سے لے لیا جاتا ہے اور دوسروں کے حوالہ کیا جاتا ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: تم میں سے ہر کوئی اپنی مسجد میں نماز پڑھے‘ دوسری مسجد میں نہ جائے۔

حضرت ابن عمر رضی اللہ عنہما فرماتے ہیں کہ میں نے رسول الله صلی اللہ علیہ وسلم کو دیکھا کہ جب آپ کو سفر میں جلدی ہوتی تھی تو آپ دو نمازوں کو جمع کرتے تھے ‘یعنی مغرب اور عشاء۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم جب مکہ سے واپس آتے تو تین دفعہ اللہ اکبر کرتے اور ’’ لا اله الا الله الى آخره ‘‘۔

حضرت نافع فرماتے ہیں کہ حضرت ابن عمر رضی اللہ عنہما جب سخت سردی محسوس کرتے اور مغرب کا وقت ہوتا تو موذن کو حکم دیتے کہ گھروں میں نماز پڑھ لو۔ اور فرمایا: میں نے رسول اللہ صلی اللہ علیہ وسلم کو ایسے کرتے ہوئے اور اس کا حکم دیتے ہوئے دیکھا ہے۔

حضرت ابن عمر رضی اللہ عنہما جب سفر سے واپس آتے تو مقامِ بطحاء جو ذی الحلیفہ کے قریب ہے ‘وہاں اپنی سواری کو بٹھاتے اور فرماتے تھے کہ حضور صلی اللہ علیہ وسلم بھی اپنی سواری کو بٹھاتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: نماز ِعشاء کا کھانا آگیا اور نماز کھڑی ہوئی تو پہلے شام کا کھانا کھائے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا : جس نے نماز عشاء باجماعت پڑھی اور چار رکعتیں مسجد سے نکلنے سے پہلے ادا کیں‘ اُس کو لیلتہ القدر کے برابر عبادت کرنے کا ثواب ملے گا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: تم میں سے بہتر وہ ہے جس کے کندھے نماز میں ملے ہوئے ہوں‘جو خالی صف کی جگہ کو پُر کرتا ہے ‘اس کے لیے سب سے بڑا ثواب ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو نعلین نہ پائے وہ موزے پہنے اورٹخنوں کے نیچے سے کاٹ لے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: تم میں سے بہتر وہ ہے جس کے کپڑے نماز میں ملے ہوئے ہوں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے مقام ِعقیق کے متعلق فرمایا: یہ مقام ِبطحاء با برکت بستی ہے۔