Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: ہر وہ مال جو سات زمینوں کے نیچے ہو ‘اس کی زکوٰۃ دی جائے‘ وہ خزانہ نہیں ہے ‘ہر مال جس کی زکوٰۃ نہ دی جائے ‘اگر ظاہر ہو تو وہ خزانہ ہے۔

حضرت ابن عمر رضی اللہ عنہما فرماتے ہیں کہ ایک آدمی نے حضور صلی اللہ علیہ وسلم سے روزہ کے متعلق پوچھا ‘آپ نے فرمایا: ایامِ بیض کے دنوں کے روزے رکھو ‘یعنی ہر ماہ کے تین روزے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے عبد اللہ بن جدعان سے فرمایا: جب تُو نئی جوتی خرید ے‘ جب تو نیا کپڑا خریدے‘ جب تو نیا جانور خریدے تو شکر ادا کر ‘جب تیرے پاس کوئی کسی قوم کا معزز آئے تو اس کی عزت کر۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو تقدیر کو جھٹلائے‘ تو اُس نے اس چیز کا انکار کیا جو محمد صلی اللہ علیہ وسلم پر نازل ہوئی۔

حضرت ابن عمر رضی اللہ عنہما فرماتے ہیں کہ ہم زمین کرائے پر دینے کو نا پسند کرتے تھے اور مرفوعاً ذکر کرتے تھے کہ حضور صلی اللہ علیہ وسلم نے اس سے منع فرمایا۔

حضرت ابن عمر رضی اللہ عنہما فرماتے ہیں کہ جب میت کو قبر پر رکھا جاتا تو حضور صلی اللہ علیہ وسلم یہ دعا کرتے: اللہ کے نام سے رسول الله صلی اللہ علیہ وسلم کی سنت ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: تم سے پہلے آدمی نکلے ‘اس کے بعد غار والی لمبی حدیث ذکر کی۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے سنین کی بیع سے منع فرمایا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم ایک صاع کھجور یا ایک صاع جَو سے صدقہ فطر ادا کرنے کا حکم دیتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: سب سے معزز مجلس وہ ہے جو قبلہ رخ ہو۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اللہ عزوجل اپنے بندہ کو آزماتا ہے تا کہ دیکھے کہ وہ کیا کرتا ہے‘ اگر خوش ہوگا تو اس کو برکت دی جائے گی ‘اور خوش نہیں ہوگا تو برکت نہیں دی جائے گی۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: سب سے پہلے اسلام حضرت ابوبکرصدیق رضی اللہ عنہ لائے۔