Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم کی انگوٹھی مبارک ساری کی ساری چاندی کی تھی‘ پھر حضرت ابوبکر کے پاس پھر حضرت عمر کے پاس پھر حضرت عثمان کے پاس رہی ‘جب تک اللہ نے چاہا‘ پھر حضرت عثمان کے پاس گم ہو گئی۔

حضرت ابن عمر رضی اللہ عنہما فرماتے ہیں کہ اس دوران کہ میں بدر کے اطراف میں چل رہا تھا کہ اچانک ایک آدمی گڑھے سے نکالا جس کی گردن میں زنجیر تھی‘پس اس نے مجھے نداء دی: اے عبداللہ! مجھے پانی پلا ‘اے اللہ کے بندے! مجھے پانی پلاؤ‘ مجھے معلوم نہیں کہ وہ میرا نام پہچانتا تھا یا اس نے عربوں کے طریقے پر مجھے عبداللہ کہہ کے پکارا اور اسی گڑھے سے ایک آدمی نکلا جس کے ہاتھ میں کوڑا تھا‘پس اس نے مجھے پکار کر کہا: اے عبداللہ ! اسے پانی مت پلانا ‘یہ اللہ کا دشمن کا فر ہے یہاں تک کہ وہ اپنے گڑھے میں لوٹ گیا‘پس میں نے نبی کریم صلی اللہ علیہ وسلم کی خدمت میں حاضر ہو کر بات بتائی تو آپ صلی اللہ علیہ وسلم نے مجھے فرمایا: کیا واقعی تُو نے اسے دیکھا ہے؟ میں نے عرض کی: ہاں! فرمایا: وہ اللہ کا دشمن ابو جہل بن ہشام تھا اور یہ عذاب اس کو قیامت تک ہوتا رہے گا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: سلام عام کرو کیونکہ یہ اللہ کو خوش کرنے کا ذریعہ ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم کو پتہ چلا کہ حضرت امام حسن بن علی رضی اللہ عنہما کو جب مسجد میں داخل ہوتے ہیں تو نبی کریم صلی اللہ علیہ وسلم پر درود پڑھتے ہیں اور دعامانگتے ہیں: ’’اللهم اغفر لنا ذنوبنا وافتح لنا ابواب رحمتك ‘‘اور جب نکلتے ہیں تو درود پڑھ کر دعا مانگتے ہیں: ’’اللهم افتح لنا ابواب فضلك‘‘

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو تکبر سے کپڑا لٹکاتا ہے ‘اللہ عز و جل اُس کی طرف قیامت کے دن نظر رحمت نہیں کرے گا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: عورت کا اپنے خادم کے ساتھ سفر کرنا دھوکہ ہے ۔

حضرت ابن عمر رضی اللہ عنہما فرماتے ہیں کہ نبی کریم صلی اللہ علیہ وسلم کیلئے سونے کی ایک انگوٹھی تھی‘ پس آپ صلی اللہ علیہ وسلم کے صحابہ میں وہ عام ہو گئی‘ یعنی انہوں نے بھی اس جیسی انگوٹھیاں بنوالیں‘پھر آپ نے فرمایا: میں کبھی نہیں پہنوں گا‘پس لوگوں نے اپنی انگوٹھیوں کو اتار پھینکا ۔ پھر آپ صلی اللہ علیہ وسلم نے چاندی کی انگوٹھی بنوائی‘ اس کے ساتھ آپ صلی اللہ علیہ وسلم صحیفوں پر مہر لگایا کرتے تھے یہاں تک کہ وہ اریس کے کنویں میں گر کر گم ہو گئی ( حضرت عثمان غنی رضی اللہ عنہ کے ہاتھ سے)۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: لوگوں کے لیے کتا رکھنا جائز نہیں ہے سوائے شکار کے۔ حضرت ابو ہریرہ رضی اللہ عنہ کا خیال ہے کہ آپ نے کھیتی کی حفاظت کیلئے کتا رکھنے کی اجازت دی ‘اگر اس کے علاوہ کیلئے ہوتو ہر رات دو قیراط ثواب کم ہوگا۔

حضرت ابن عمر رضی اللہ عنہما فرماتے ہیں کہ عید الفطر اور عید الاضحی ٰکے موقع پر میں نبی کریم صلی اللہ علیہ وسلم کے ساتھ تھا ‘پس آپ صلی اللہ علیہ وسلم نے نہ عید سے پہلے اور نہ بعد میں کبھی نماز پڑھی۔

حضرت ابن عمر رضی اللہ عنہما روایت فرماتے ہیں کہ رسول کریم صلی اللہ علیہ وسلم کہا کرتے تھے : ’’سمع اللہ لمن حمده ربنا لك الحمد “ پھر سجدہ کرنے سے پہلے کہتے : اے اللہ ! فلاں فلاں پر لعنت فرما‘پھر تکبیر کہہ کر سجدہ کرتے یہاں تک کہ اللہ نے یہ آیت نازل فرمائی: ’’ليس لك من الامر شيء الآية‘‘۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو اللہ اور آخرت کے دن پر ایمان رکھتا ہے ‘وہ حمام میں تہبند پہن کر داخل ہو۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم جمعہ کے دن جب مسجد میں داخل ہوتے تو اس آدمی پر سلام کرتے جو آپ صلی اللہ علیہ وسلم کے پاس بیٹھا ہوا ہوتا تھا‘ پس جب منبر پر چڑھتے تو لوگوں کی طرف متوجہ ہو کر ان پر سلام کرتے ۔