Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ ہم رسول کریم صلی اللہ علیہ وسلم کے پاس تھے تو ایک قبیح شکل والا قبیح کپڑوں والا اور تمام لوگوں سے زیادہ بُری بُو والا آدمی آیا ‘سخت مزاج اور روکھا سوکھا تھا۔ پس لوگوں کی گردنوں سے پھلانگتا ہوا رسول کریم صلی اللہ علیہ وسلم کے سامنے آکر بیٹھ گیا۔ کہا: آپ کو کس نے پیدا کیا؟ فرمایا: اللہ نے ۔ اس نے کہا: آسمان کو کس نے پیدا کیا؟ فرمایا: اللہ نے ‘اس نے کہا: زمین کو کس نے پیدا کیا؟ فرمایا: اللہ نے ۔ اس نے کہا: اللہ کو کس نے پیدا کیا؟ تو رسول کریم صلی اللہ علیہ وسلم نے فرمایا: اللہ پاک ہے ‘دوبار اور چہرہ پھیر لیا ‘پھر وہ اُٹھ کر چلا گیا۔ رسول کریم صلی اللہ علیہ وسلم نے فرمایا: اس آدمی کو لوٹا کر لے آؤ ۔ پس ہم نے اسے بڑا تلاش کیا‘ پس وہ کہیں نہیں تھا۔ رسول کریم صلی اللہ علیہ وسلم نے فرمایا: یہ ابلیس تھا‘ وہ تمہارے دین کے بارے میں تمہیں شک میں ڈالنے آیا تھا۔

حضرت ابن عمر رضی اللہ عنہما فرماتے ہیں کہ مکہ میں دو اپاہج تھے ‘جن کا ایک بیٹا تھا‘ پس جب صبح ہوتی تو وہ ان دونوں کو اُٹھا کر مسجد میں لاتا ‘پس وہ ان کے لیے سارا دن کمائی کرتا ‘جب شام ہوتی تو ان کو اُٹھا کر لے جاتا ‘ان کے آگے کرتا۔ پس ایک دن رسول کریم صلی اللہ علیہ وسلم نے ان دونوں کو نہ پایا اور ان کے بارے پوچھا‘پس کسی نے کہا: ان کا بیٹا فوت ہو گیا ہے۔ رسول کریم صلی اللہ علیہ وسلم نے فرمایا: اگر کسی کی خاطر کسی کو چھوڑا جا تا تو ان اپاہجوں کے بیٹے کو چھوڑا جاتا۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: جس کے پاس دو کپڑے ہوں تو ان دونوں کو پہنے اور جس کے پاس ایک کپڑا ہو ‘وہ اس کا تہبند بنالے لیکن یہود والا طریقہ اختیار نہ کرے۔

حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وسلم نے فرمایا: تصویریں بنانے والوں کو قیامت کے دن عذاب دیا جائے گا اور ان سے کہا جائے گا: جو تم نے بنایا ‘اسے زندہ کرو۔

حضرت ابن عمر رضی اللہ عنہما سے مروی ہے کہ رسول کریم صلی اللہ علیہ وسلم کے پاس ایک آدمی نے آکر عرض کی : اے اللہ کے رسول ! لوگوں میں سے کون اللہ کو زیادہ محبوب ہے؟ اور کون سا عمل اللہ کو زیادہ پسند ہے؟ رسول کریم صلی اللہ علیہ وسلم نے فرمایا: سب لوگوں سے زیادہ پسندیدہ وہ آدمی ہے جولوگوں کو زیادہ نفع دینے والا ہے اور اللہ کو بہت زیادہ پسند کسی مسلمان بھائی کو خوشی عطا کرنا ‘یا اس سے مصیبت کو دور کرنا ‘یا اس کی ضرورت کو پورا کرنا ‘یا اس سے بھوک کو دور کرنا ہے ‘اپنے بھائی کی ضرورت میں اس کے ساتھ چلنا‘ مجھے اس کے مسجد (نبوی) میں اعتکاف کرنے سے زیادہ پسند ہے ‘جس نے غصے کو روکا تو اللہ تعالی ٰاس کے عیب چھپائے گا‘ جس نے غصے کو پی لیا حالانکہ اگر چاہتا تو بدلہ لے سکتا تھا تو قیامت کے دن اللہ اس کے دل کو امن سے بھر دے گا اور جو آدمی اپنے بھائی کی ضرورت پوری کرنے چلا یہاں تک کہ اس کو پورا کر دیا تو اللہ پل صراط پر اس کو ثابت قدم رکھے گا‘ جب پاؤں پھسل رہے ہوں گے۔

حضرت ابن عمر رضی اللہ عنہما سے اللہ تعالیٰ کے اس فرمان کے بارے میں روایت ہے: ” و آتوا حقه يوم حصادہ ‘‘فرمایا : مراد ہے کہ وہ لوگ صدقہ واجبہ کے علاوہ اپنی آمدن سے کچھ دیا کرتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: سخت گرمی میں نماز کو ٹھنڈا کر کے پڑھو کیونکہ سخت گرمی‘ جہنم کی بھڑاس سے ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: پچھنا لگانے اور لگوانے والا روزہ افطار کریں۔

حضرت ابن عمر رضی اللہ عنہما فرماتے ہیں: جس کی آنکھ کی بینائی اللہ لے جائے ‘وہ صبر کرے اور ثواب حاصل کرے تو اللہ پر حق ہے کہ اس کی آنکھوں کو جہنم نہ دکھائے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جس نے اللہ کی رضا کے حصول کیلئے مسجد بنائی ‘اگر چہ اس میں حصہ گھونسلے کے تنکے کے برابر ڈالا ‘اللہ عزوجل اس کے لیے جنت میں گھر بنائے گا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم سفید آستین زیب تن کیا کرتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم صفا و مروہ کے درمیان وادی بطن مسیل کےدرمیان چلتے تھے۔