Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ میں حضور صلی اللہ علیہ وسلم کے ساتھ انصار کے ایک باغ میں داخل ہوا ‘میں نے آپ کو پکی تازہ کھجوریں دیں‘پس آپ نے کھائیں اور فرمایا: اے ابن عمر! یہ پہلا کھانا ہے جو تین دن سے ہم نے کھایا ہے۔

حضرت ابن عمر رضی اللہ عنہما فرماتے ہیں کہ دو آدمی حضور صلی اللہ علیہ وسلم کے پاس جھگڑا لے کر آئے ‘آپ نے فرمایا: میں ( بظاہر ) انسان ہوں‘میں تمہارے درمیان فیصلہ کروں گا جو میں نے تم سے سنا ہے ‘ہو سکتا ہے کہ کوئی اپنے بھائی سے زیادہ تیز زبان ہو اپنی دلیل بیان کرنے میں۔ پس جس آدمی کیلئے میں اس کے بھائی کے حق میں سے کسی چیز کا فیصلہ کروں تو گویا اس نے مجھ سے آگ کا ٹکڑا لیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم قضاء حاجت کے لیے مقام مغمس میں جاتے تھے ۔ حضرت نافع فرماتے ہیں: یہ مقام مکہ سے تقریباً دو میل پر تھا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے نجد کی طرف ایک سریہ بھیجا‘ ہم کو بارہ حصے دیئے ‘ہم کو رسول اللہ صلی اللہ علیہ وسلم نے ایک ایک اونٹ زیادہ دیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے اہل مدینہ کے لیے ذی الحلیفہ اور شام والوں کے لیے جحفہ اور یمن والوں کیلئے یلملم اور طائف والوں کے لیے قرن میقات مقرر کیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے مٹکے اور مزفت اور دباء اور نقیر میں نبیذ بنانے سے منع کیا۔

حضرت ابن عمر رضی اللہ عنہما فرماتے ہیں کہ ہم نے حنین کے دن دو گروہ مدد کرنے والے دیکھے حالانکہ رسول الله صلی اللہ علیہ وسلم کے ساتھ صرف سو آدمی تھے۔

حضرت ابن عمر رضی اللہ عنہما فرماتے ہیں کہ ان سے کہا گیا: آپ نے حضرت عبداللہ بن مسعود رضی اللہ عنہ کی خوب تعریف کی ہے؟ فرمایا: مجھے اس سے کیا رکاوٹ تھی حالانکہ میں نے رسول کریم صلی اللہ علیہ وسلم سے سنا ‘آپ فرما ر ہے تھے: چار آدمیوں سے قرآن پڑھو: عبد اللہ بن مسعود ‘ابن حذیفہ کے غلام سالم ‘ابی بن کعب ‘معاذ بن جبل ۔ پھر فرمایا: میں نے ارادہ کیا کہ حضرت عیسی ٰکی طرح میں بھی مختلف گروہوں کی طرف حواری بھیجوں ۔ عرض کی گئی : اے اللہ کے رسول! کیا آپ ابوبکر وعمر کو نہیں بھیجیں گے‘ وہی افضل ہیں؟ فرمایا: میں ان دونوں سے بے پرواہ نہیں ہوں‘ وہ تو اس دین سے یوں ہیں جیسے سر کی آنکھیں اور کان ہوتے ہیں۔

حضرت ابن عمر رضی اللہ عنہما فرماتے ہیں کہ جب ’’مثل الذين اموالهم في سبيل الله الى آخره “ والی آیت نازل ہوئی تو رسول کریم صلی اللہ علیہ وسلم ٍنے فرمایا: اے میرے رب ! میری اُمت کے اجر میں اضافہ فرما۔ تو یہ آیت نازل ہوئی : ’’من ذا الذي يقرض الله الى آخرہ ‘‘۔ عرض کی : میری اُمت کے اجر میں اضافہ فرما۔ پھر یہ آیت نازل ہوئی: ’’انما يوفى الصابرون الى آخره‘‘۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم جب نماز میں بیٹھتے تو اپنے دست مبارک گھٹنوں پر رکھتے تھے۔

حضرت نافع فرماتے ہیں کہ میں نے حضرت ابن عمر رضی اللہ عنہما کو اس حال میں دیکھا کہ ایک آدمی نے آپ کے پہلو میں چھینک ماری اور کہا:’’الحمد لله وسلام على رسول الله ‘‘ تو حضرت ابن عمر رضی اللہ عنہمانے فرمایا: میں بھی ’’السلام على رسول الله ‘‘ کہہ سکتا ہوں لیکن اس طرح رسول کریم صلی اللہ علیہ وسلم نے ہمیں حکم نہیں دیا ‘جب ہمیں چھینک آتی تو ہم کیا کرتے: ’’الحمد لله على كل حال ‘‘۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے اشج عبدالقیس سے فرمایا: آپ میں دو باتیں ہیں اور وہ دونوں اللہ کو پسند ہیں: بردباری اور رحم کرنا۔