Al Muajam Al Kabir Tibrani

حضرت ابن عمر رضی اللہ عنہما سے مروی ہے کہ رسول کریم صلی اللہ علیہ وسلم نے دو گروہوں میں سے ایک گروہ کو صلوٰة الخوف ‘ایک رکعت پڑھائی پھر دوسرا گروہ آیا تو آپ نے اسے ایک رکعت پڑھائی پھر دو سجدے کیے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم ٍکو جب سفر میں جلدی ہوتی تو نمازیں اکٹھے پڑھتے : مغرب اور عشاء۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: ذمی کی دیت ‘مسلمان کی دیت کانصف ہے۔

حضرت ابن عمر رضی اللہ عنہما کے بارے مروی ہے کہ آپ تمام سانپوں کو مارنے کا حکم فرمایا کرتے تھے یہاں تک کہ ان کو حضرت ابولبابہ بن منذر نے خبر دی کہ نبی کریم صلی اللہ علیہ وسلم نے گھروں میں رہنے والے سانپوں کو مارنے سے منع کیا اور بیان کیا کہ ایک بار نبی کریم صلی اللہ علیہ وسلم حجر اسود کوچومنے گئے تو آپ صلی اللہ علیہ وسلم کو بچھونے کاٹ لیا‘آپ صلی اللہ علیہ وسلم نے فرمایا: تجھے کیا ہے! اللہ تجھ پر لعنت کرے! اگر تُو کسی کو چھوڑتا تو نبی صلی اللہ علیہ وسلم کو چھوڑتا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے محرم کو پانچ جانور مارنے سے منع کیا: کوّا‘ چیل‘پاگل کتا ‘بچھو اور سانپ۔

حضور صلی اللہ علیہ وسلم نے فرمایا: دو بیع کرنے والوں کو اختیار ہے جب تک دونوں جدا نہ ہوں ‘اور وہ دونوں اکٹھے ہوں تو ان میں سے ایک اپنے ساتھی کو اختیار دے‘ اگر ان میں سے ایک دوسرے سے اختیار لے تو دونوں کی بیع پکی ہو گی ۔

حضرت صلی اللہ علیہ وسلم نے فرمایا: فقراء ‘مال داروں سے پانچ سو سال پہلے جنت میں داخل ہوں گے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: کسی عورت سے اللہ تعالٰی نماز قبول نہیں کرتا یہاں تک کہ وہ اپنی زینت کو چھپالے اور نہ کسی بالغ لونڈی سے یہاں تک کہ وہ اوڑھنی کر لے۔

حضرت ابن عمر رضی اللہ عنہما ‘رسول کریم صلی اللہ علیہ وسلم سے حدیث بیان کرتے ہیں کہ آپ صلی اللہ علیہ وسلم نے فرمایا: بے شک پرندہ ‘اپنی چونچ زمین پر مارتا ہے اور اپنی دُم ہلاتا ہے ‘صرف قیامت کے دن کے خوف کی وجہ سے ایسا کرتا ہے اور گواہ جو جھوٹی گواہی دیتا ہے وہ ابھی زمین پر پاؤں رکھتاہی ہے کہ دوزخ کی آگ میں ڈال دیا جاتا ہے۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: کوئی چھوت چھات نہیں ہے ‘نہ بدفالی ہے اور نہ ھامہ ہے۔ پس ایک اعرابی نے کھڑے ہو کر عرض کی : ایک اونٹ کو بیماری لگی ہوئی تھی‘ وہ تندرست اونٹوں میں رہا تو انہیں بھی بیماری لگ گئی۔ فرمایا: یہ تقدیر ہے ‘پس تُو بتا پہلے کو کس نے بیماری لگائی۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے قرآن کریم کو دشمن کی زمین کی طرف اُٹھا کر لے جانے سے منع فرمایا‘اس خوف سے کہ دشمن اس کو چھین نہ لے (اور بے حرمتی کرے ) ۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: باجماعت نماز پڑھنے پر اکیلے نماز پڑھنے سے ستائیس گنا زیادہ ثواب ملتا ہے۔