Al Muajam Al Kabir Tibrani

حضرت ابن عمر رضی اللہ عنہما فرماتے ہیں:حضور صلی اللہ علیہ وسلم نے فرمایا: جب تُو نماز پڑھ رہا ہو اور کوئی آدمی تیرے سامنے سے گزرنے کا ارادہ کرے تو اسے روک دے ‘پس اگر وہ دوبارہ آئے تو اسے روک دے ‘اگر پھر آئے تو روک دے ‘پس چوتھی بار وہ آئے تو اس سے جھگڑا کر کیونکہ وہ شیطان ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: عورت کے لیے حرام اس کے چہرے کی وجہ سے ہے۔

حضرت محمد بن سیرین فرماتے ہیں کہ میں نے حضرت ابن عمر رضی اللہ عنہا سے پوچھا: کیا قربانی واجب ہے؟ فرمایا: حضور صلی اللہ علیہ وسلم اور آپ کے بعد مسلمان کرتے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: ہر اونٹ کی کوہان پر شیطان ہوتا ہے ‘اس کو ذلیل کرو۔

حضرت قیصر فرماتے ہیں کہ حضرت ابن عمر رضی اللہ عنہما سواری پر نماز پڑھتے تھے جس طرف بھی اس کا منہ ہوتا تھا‘ آپ سے اس کے متعلق پوچھا گیا کہ یہ سنت ہے؟ فرمایا: سنت ہے۔ انہوں نے عرض کی: آپ نے رسول الله صلی اللہ علیہ وسلم سے سنا ہے؟ آپ نے تبسم فرمایا اور فرمایا: میں نے آپ سے سنا ہے ۔

حضرت نافع فرماتے ہیں کہ حضرت ابن عمر رضی اللہ عنہا حج کا تلبیہ سواری پر بیٹھ کر پڑھتے تھے اور فرماتے تھے میں نے رسول اللہ صلی اللہ علیہ وسلم کو دیکھا کہ جب آپ سواری پر سیدھے بیٹھ جاتے تو تلبیہ پڑھتے ۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: نوحہ کرنے والیوں پر تارکول کی چادر ڈال دو۔

حضرت ابن عمر رضی اللہ عنہما فرماتے ہیں کہ رسول کریم صلی اللہ علیہ وسلم نے فرمایا: خرچ میں میانہ روی ‘آدھی روزی ہے ‘لوگوں سے محبت کرنا نصف عقل ہے ‘اچھے طریقہ سے سوال کرنا نصف علم ہے۔

حضرت ابن عمر رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کے بعد لوگوں میں سب سے زیادہ اسود بن معاویہ کو دیکھا۔

حضرت نافع فرماتے ہیں کہ میں حضرت ابن عمر رضی اللہ عنہما کے پیچھے سواری پر سوار تھا‘ جب آپ ایک مزامیر والے چرواہے کے پاس سے گزرے تو اونٹنی کے منہ پر مار کر اسے راستے سے ایک طرف پھیر لیا ‘پھر اپنی دو انگلیاں دونوں کانوں میں ڈال لیں اور فرمایا: میں نے رسول کریم صلی اللہ علیہ وسلم کو ایسا کرتے ہوئے دیکھا۔

حضرت ابن عمر رضی اللہ عنہما سے مروی ہے کہ انہوں نے حضرت نعیم بن عبد اللہ کو ان کی بیٹی نجام کے لیے نکاح کا پیغام دیا جبکہ وہ کنواری تھی‘ حضرت نعیم نے ان سے کہا کہ میرے پاس ایک یتیم بچہ ہے ‘اس پر میں کسی کو ترجیح نہیں دوں گا ‘اُم جاریہ نعیم کی بیوی نکلی‘یہاں تک کہ حضور صلی اللہ علیہ وسلم کے پاس آئی اور اس بات کی خبر دی اور اس نے نبی کریم صلی اللہ علیہ وسلم کو خبر دی کہ وہ اس کو نا پسند کرتی ہے اور اپنے یتیم بچے کی بھی خبر دی ‘رسول کریم صلی اللہ علیہ وسلم نے اس کے باپ کی طرف پیغام بھیجا کہ اس کو اور اس کے بیٹے کو راضی کرے۔

حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وسلم نے فرمایا: بے شک رمضان المبارک کیلئے جنت سال کے آخر سے اگلے سال تک سجائی جاتی ہے‘ پس جب رمضان کا پہلا دن ہوتا ہے تو عرش کے نیچے سے ہوا چلتی ہے ‘پس وہ موٹی آنکھوں والی حوروں کے حوالے سے جنت کے پتوں کو ہلاتی ہے۔ پس وہ کہتی ہیں: اے ہمارے رب ! اپنے بندوں میں سے ہمارے لیے بیویاں بنا ‘جن کے ساتھ ہم اپنی آنکھیں ٹھنڈی کریں اور وہ ہم سے اپنی آنکھیں ٹھنڈی کریں۔