Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: لا اله الا الله محمد رسول اللہ پڑھنے والے کو موت کے وقت وحشت (ڈر ) محسوس نہیں ہوتی اور نہ قبر میں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: ماں کا ذبح بچہ کا ذبح ہے۔

حضرت ابن عمر رضی اللہ عنہما فرماتے ہیں کہ ہمیں جنازہ کے ساتھ آگ لے جانے سے منع کیا گیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: توحید ورسالت کا اقرار کرنے والوں کو ان کی قبروں میں اور قبروں سے اُٹھتے وقت وحشت نہیں ہوگی‘گویا کہ میں اب بھی لا الہ الا اللہ پڑھنے والوں کو دیکھ رہا ہوں ‘وہ اپنے سروں سے مٹی جھاڑ رہے ہیں اور عرض کر رہے ہیں: تمام تعریفیں اللہ کے لیے ہیں جو ہم سے غم کو لے گیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم بکری میں سات چیزوں کو نا پسند کرتے تھے: رگ ‘مثانہ ‘محیاۃ‘ذکر ‘خصیے‘ ، غدہ اور خون اور حضور صلی اللہ علیہ وسلم بکری کے آگے والے حصہ کے گوشت کو زیادہ پسند کرتے تھے ‘آپ کے پاس کھانا لایا گیا تو لوگ کھانے لگے۔ آپ صلی اللہ علیہ وسلم نے فرمایا: سب سے پاکیزہ اور اچھا گوشت پیٹھ کا گوشت ہے۔

اور اسی سند کے ساتھ حضرت ابن عمر رضی اللہ عنہما سے اللہ تعالیٰ کے قول ’’غافر الذنب ‘‘کے بارے میں مروی ہے ‘ ’’غافر الذنب ‘‘ سے مراد وہ آدمی ہے جو لا الٰہ اللہ کہتا ہے ‘ ’’قابل التوب “ اس سے ہے جو لا الہ ٰالا اللہ کہتا ہے‘ ”شديد العقاب ‘‘ اس کیلئے ہے جو لا الہٰ الا اللہ نہیں کہتا ہے ۔ ’’ذی الطول “ کا معنى ’’ذى الغنى لا اله الا هو ‘‘ہے۔ کفار ِقریش اس کی وحدانیت کا اقرار نہیں کرتے تھے تو اللہ نے اپنی وحدانیت کا خود اعلان فرمایا۔ ’’اليه المصير ‘‘ کا معنی ہے: اسی کی طرف ہر آدمی جائے گا جو لا الہٰ الا اللہ کہتا ہے اور جنت میں داخل ہوگا‘اور جولا الہ ٰالا اللہ نہیں کہتا ہے وہ دوزخ میں جائے گا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: غسل ایک صاع سے اور وضو ایک مُد سے ہے۔

حضرت ابن عمر رضی اللہ عنہما فرماتے ہیں کہ ایک آدمی فوت ہوا تو لوگ رسول کریم صلی اللہ علیہ وسلم کے پاس سے گزرے‘ اُنہوں نے اس پر نماز پڑھنے کی دعوت دی‘فرمایا: تمہارے ساتھی پر قرض تو نہیں ہے؟ عرض کی: اے اللہ کے رسول ! ہاں ! دو دینار ہیں۔ فرمایا: تم اپنے ساتھی کا جنازہ خود پڑھو۔ پس اس کے قریبی رشتہ داروں میں سے ایک نے کہا: اے اللہ کے رسول ! وہ میرے ذمہ ہوا فرمایا: کیا وہ تیرے اوپر ہوا ‘وہ اس سے بَری ہے؟ عرض کی: ہاں! اس کے بعدآپ صلی اللہ علیہ وسلم نے اس کی نماز جنازہ پڑھائی۔ اس کے بعد قرض اپنے ذمہ لینے والا آدمی آپ صلی اللہ علیہ وسلم سے ملا تو آپ نے فرمایا : تُو نے کیا کیا ؟ اس نے عرض کی : مجھے وقت نہیں ملا۔ فرمایا: وہ تیرے ساتھی پر لوٹ جائے گا پھر اس نے جلدی ادا کرنے کے بعد آپ سے ملاقات کی اور عرض کیا: اے اللہ کے رسول ! میں نے ادا کر دیا ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اللہ عزوجل قیامت کے دن زمین پر قبضہ فرمائے گا اور آسمانوں کو اپنے دائیں دست ِقدرت سے لپیٹ لے گا‘ پھر ان کو ہٹا دے گا‘ پھر فرمائے گا: میں بادشاہ ہوں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جبریل علیہ السلام میرے پاس وحی لائے ‘سب سے پہلے مجھ سے بسم اللہ الرحمن الرحیم پڑھنے کی عرض کی۔

حضرت ہشام بن عروہ اپنے والد سے روایت کرتے ہیں کہ حضرت ابن عمر رضی اللہ عنہما ایک دن نماز کی اقامت پڑھی ‘لوگوں میں ایک کو فرمایا : آگے ہو کر نماز پڑھاؤ کیونکہ میں نے رسول اللہ صلی اللہ علیہ وسلم کو فرماتے ہوئے سنا: جو شخص پیٹ سے ( گڑ گڑ کی ) آواز سنے وہ وضو کرے۔

حضرت سعید بن جبیر فرماتے ہیں کہ میں حضرت ابن عمر رضی اللہ عنہما کے ساتھ چل رہا تھا‘آپ اپنی قوم کے پاس سے گزرے‘جنہوں نے نشانہ بازی کے لیے پرندہ باندھا ہوا تھا۔ حضرت ابن عمر رضی اللہ عنہما نے فرمایا: حضور صلی اللہ علیہ وسلم نے ایسا کرنے والوں پر لعنت فرمائی ہے۔