Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم مقامِ حقیق پر نماز قصر کرتے تھے۔

حضرت ابن عمر رضی اللہ عنہما فرماتے ہیں: حضور صلی اللہ علیہ وسلم نے فرمایا: کوثر جنت میں ایک نہر ہے ‘اس کے دونوں کنارے سونے کے ہیں‘ اس پر موتی اور یاقوت کے ( برتن ہوں گے)۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے ایک سریہ بھیجا‘ میں اس میں شریک تھا‘ ہم بارہ آدمی تھے ‘ایک اونٹ حصہ کے طور پر دیا گیا اور اضافی طور پر حضور صلی اللہ علیہ وسلم نے ایک ایک اونٹ دیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے حضرت نجاشی کی نماز ِجنازہ پڑھائی ‘آپ نے چار تکبیریں کہیں۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: افضل عبادت فقہ حاصل کرنا ہے ‘افضل دین پر ہیز گاری ہے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جب تم میں سے کوئی نماز پڑھے تو دو کپڑے پہن کر پڑھے کیونکہ اللہ زیادہ حق رکھتا ہے کہ اس کے لیے خوبصورتی کی جائے ‘جس کے پاس دو کپڑے نہ ہوں وہ تہبند پہن لے‘ جب نماز پڑھے اور تم میں سے کوئی ایک اپنی نماز میں یہود کی طرح ایک ہی کپڑے میں نہ لپٹ جائے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے ’’فشاربون شرب الهيم ‘‘ پڑھا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم کو وہ شی دی گئی ہے جو سوائے حضور صلی اللہ علیہ وسلم کے کسی کو نہیں دی گئی ‘یعنی جماع کی طاقت۔

حضرت ابن عمر رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کو کعبہ کی طرف منہ کر کے تشریف فرما دیکھا ‘آپ نے دونوں ہاتھوں کے ساتھ گھٹنے پکڑے ہوئے تھے۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: سواریاں تین مسجدوں کیلئے باندھو: مسجد حرام ‘مسجد نبوی ‘مسجد اقصیٰ ۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے ہمیں زنا سے پیدا ہونے والی اولاد کو آزاد کرنے کا حکم دیا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: اگر مجھے اپنی اُمت کی مشقت کا خوف نہ ہوتا تو میں ہر نماز کے وقت مسواک کرنے کا حکم دیتا۔