Al Muajam Al Kabir Tibrani

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: دو آدمیوں کی نماز ان کے سروں سے تجاوز نہیں کرتی ہے: بھاگے ہوئے غلام کی واپس آنے تک ‘ جس عورت سے اُس کا شوہر ناراض ہو۔

حضرت نافع فرماتے ہیں کہ میں حضرت ابن عمر رضی اللہ عنہما کے ساتھ ایک سفر میں تھا‘ آپ نے سواری کو تیز کیا یہاں تک کہ سورج غروب ہو گیا‘ میں نے آپ کو آواز دی: اے ابو عبد الرحمن ٰ! نماز ! پس وہ چلتے رہے یہاں تک کہ ستارے ظاہر ہو گئے ‘ آپ نماز مغرب پڑھیں اور پھر نماز عشاء دو رکعت پھر فرمایا : حضور صلی اللہ علیہ وسلم کو جب کسی کام کی جلدی ہوتی تو اس طرح نماز پڑھتے تھے ۔

حضرت نافع فرماتے ہیں کہ حضرت ابن عمر رضی اللہ عنہما کی خدمت میں ایک آدمی نے آکر عرض کی : آپ نے رسول کریم صلی اللہ علیہ وسلم سے نجویٰ کے بارے میں کیسے سنا ہے؟ حضرت ابن عمر رضی اللہ عنہما نے فرمایا: میں نے رسول کریم صلی اللہ علیہ وسلم سے سنا کہ آپ فرما رہے تھے :اللہ تعالی ٰقیامت کے دن بندے کو اپنے قریب کرے گا ‘پس لوگوں سے اس کا معاملہ پوشیدہ رکھے گا اور اس سے اس کے گناہوں کا اقرار کروائے گا۔ پس فرمائے گا: کیا تُو فلاں فلاں گناہ کو پہچانتا ہے؟ ( جو تُو نے کیا تھا) پس وہ آدمی عرض کرے گا: ہاں ! اے میرے رب! اور فرمائے گا: کیا تُو فلاں فلاں گناہ کو جانتا ہے؟ پس وہ عرض کرے گا: ہاں! اے میرے رب! پس جب وہ اپنے گناہوں کا اعتراف کرے گا اور گمان کرے گا کہ وہ ہلاک ہوا تو اللہ فرمائے گا: آج میں نے تیرے اوپر پردہ ڈالا ہے۔ فرمایا: پھر اس کی نیکیوں کی کتاب اسے عطا کی جائے گی۔ فرمایا لیکن منافق اور کافر ( کے حوالے سے) سب لوگوں کے سامنے اعلان کیا جائے گا: یہ وہ لوگ ہیں جنہوں نے اپنے رب کو جھٹلایا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا تم سب نگہبان ہو ‘تم سب سے اس کی نگہبانی کے متعلق پوچھا جائے گا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے تازہ اور خشک کھجور کی نبیذ بنانے سے منع کیا۔

حضرت ابن عمر رضی اللہ عنہما فرماتے ہیں کہ میں نے حضور صلی اللہ علیہ وسلم کے سامنے سورہ واقعہ پڑھی ‘جب فروح وریحان کے مقام پر پہنچا تو آپ نے فرمایا: فروح وریحان پڑھو‘اے ابن عمر ۔

حضرت ابن عمر رضی اللہ عنہما فرماتے ہیں کہ میں نے رسول اللہ صلی اللہ علیہ وسلم کو دو اینٹوں کے درمیان ظاہر ہوتے ہوئے دیکھا‘آپ گھر کی چھت پر قبلہ رُخ تھے۔ حضرت ایوب بن عتبہ فرماتے ہیں: گویا اچانک نگاہ پڑی۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم سے عرفہ کے دن کے متعلق پوچھا گیا تو آپ نے فرمایا: حق ہے۔

حضرت ابن عمر رضی اللہ عنہما فرماتے ہیں کہ میں نے رسول کریم صلی اللہ علیہ وسلم کو فرماتے ہوئے سنا: جس نے کہا: ’’سبحان الله الی آخرہ ‘‘تو اُس کیلئے ہر حرف کے بدلے دس نیکیاں لکھی جائیں گی ‘جس نے باطل جھگڑے میں کسی کی مدد کی ‘وہ اللہ کی ناراضگی میں ہوگا یہاں تک کہ اس سے دستبردار ہو جائے‘ جس آدمی کی سفارش سے اللہ کی حد روک دی گئی‘ پس اس نے اللہ کے حکم کی مخالفت کی‘ جس آدمی نے کسی مومن مرد یا مؤمن عورت کو مبہوت کیا (ڈرایا) تو قیامت کے دن اللہ تعالی ٰاسے دوزخیوں کی پیپ میں روک لے گا یہاں تک کہ وہ اپنے قول سے باہر نکلے ‘لیکن نکلنا اس کے بس سے باہر ہو گا۔

حضرت ابن عمر رضی اللہ عنہما فرماتے ہیں کہ حضور صلی اللہ علیہ وسلم نے فرمایا: جو زیادہ گفتگو کرے گا ‘اُس کے گناہ زیادہ ہوں گے‘ جس کے گناہ زیادہ ہوں گے وہ جہنم میں جلنے کا زیادہ حقدار ہے ‘جو اللہ اور آخرت کے دن پر ایمان رکھتا ہے وہ اچھی بات کرے یا خاموش رہے۔

حضرت ابن عمر رضی اللہ عنہما ‘اللہ عزوجل کے ارشاد: ’’حج کے مہینے معلوم ‘‘کی تفسیر کرتے ہیں کہ حضور صلی اللہ علیہ وسلم نےفرمایا: اس سے مرادذوالقعدہ اور ذوالحجہ ہیں ۔

حضرت ابن عمر رضی اللہ عنہما فرماتے ہیں: حضور صلی اللہ علیہ وسلم نے فرمایا: جس گھر میں کوئی بچہ پیدا ہو‘ان میں صبح عزت والی ہوتی ہے جو ( پہلے ) نہیں تھی۔