Al Muajam Al Sagheer Tibrani - Sunan

سیدنا معاذ بن جبل رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”میں تم سے تین چیزوں سے ڈرتا ہوں مگر وہ ہوکر رہیں گى۔ (1)عالم کى لغزش۔ (2) قرآن میں منافق کا جھگڑا کرنا۔ (3) تم پر دنیا کھول دى جا ئے گى۔“

سیدنا ثوبان رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”تم اسلام پر سیّدھے، درست اور مضبوطى سے کھڑے رہو مگر تم کما حقہ استقامت اختیار نہیں کرسکتے، اور جان لو کہ تمہارے بہترین اعمال میں سے نماز ہے اور وضو کى حفاظت صرف مومن ہى کر سکتا ہے۔“

سیدنا سلمان فارسی رضی اللہ عنہ فرماتے ہیں: رسول اللہ صلی اللہ علیہ وسلم نے وضو کیا پھر جو کوٹ آپ صلی اللہ علیہ وسلم پہنے ہوئے تھے، اسے الٹا کر کے اس سے اپنا چہرہ مبارک صاف کیا۔

سیدنا ابوبکر صدیق رضی اللہ عنہ کہتے ہیں: میں رسول اللہ صلی اللہ علیہ وسلم کے پاس بیٹھا ہوا تھا تو ایک آدمی آیا جس نے وضو کیا تھا مگر اس کے پاؤں میں ایک جگہ تھی جس کو پانی نہیں پہنچا تھا تو آپ صلی اللہ علیہ وسلم نے اسے فرمایا: ”جاؤ اور اپنے وضو کو مکمل کرو۔“ تو اس نے اسی طرح کیا۔

سیدنا جابر رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جو شخص ان سبزیوں میں سے کچھ کھائے، یعنی لہسن، پیاز، گندنا اور مولی تو ہماری مسجد کے قریب نہ آئے کیونکہ فرشتے بھی اس چیز سے تکلیف محسوس کرتے ہیں جس سے انسانوں کو تکلیف ہوتی ہے۔“

سیدہ عائشہ رضی اللہ عنہا کہتی ہیں کہ میں نبى کریم صلی اللہ علیہ وسلم کے کپڑے سے منی کھرچ دیتی تو آپ صلی اللہ علیہ وسلم اس میں نماز ادا فرماتے۔

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”کوئی آدمی کسی مرد سے اور نہ کوئی عورت کسی عورت سے مباشرت کرے۔“

سیدنا انس بن مالک رضی اللہ عنہ کہتے ہیں: نبی صلی اللہ علیہ وسلم جب بیت الخلاء میں جاتے تو یہ دعا پڑھتے: اَللّٰهُمَّ إِنِّيْ اَعُوْذُبِكَ مِنَ الْخُبُثِ وَالْخَبَائِثِ ۔

ابراہیم بن ابی عبلہ کہتے ہیں: میں نے سیدنا انس بن مالک رضی اللہ عنہ سے پوچھا: میں وضو کیسے کروں؟ انہوں نے کہا: تو نے یوں سوال کیا کہ وضو کیسے کروں اور یہ نہ پوچھا کہ تم نے رسول اللہ صلی اللہ علیہ وسلم کو وضو کرتے کس طرح دیکھا ہے؟ میں نے آپ صلی اللہ علیہ وسلم کو دیکھا کہ آپ صلی اللہ علیہ وسلم تین تین بار وضو کر رہے ہیں اور فرمایا: ”اس طرح وضو کرنے کا مجھے میرے رب نے حکم دیا ہے۔“

سیدنا ابوہریرہ رضی اللہ عنہ کہتے ہیں: نبی کریم صلی اللہ علیہ وسلم نے فرمایا: ”جب تم میں سے کسی کا ہاتھ اپنی شرمگاہ پر بغیر حجاب کے لگ جائے تو اس پر وضو لازم ہو جاتا ہے۔“

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جو وضو کرے تو وہ ناک جھاڑے اور جو استنجا کرے تو وہ طاق پتھر استعمال کرے۔“

سیدنا ابن عمر رضی اللہ عنہما کہتے ہیں: نبى صلی اللہ علیہ وسلم نے فرمایا: ”جس میں امانت نہیں اس کا ایمان نہیں، جس کا وضو نہیں اس کی نماز نہیں، اور دین میں نماز کے یہ مثال ہے جیسے سر باقی جسم سے ہے۔“