Al Muajam Al Sagheer Tibrani - Sunan

سیدنا ابوہریرہ رضی اللہ عنہ کہتے ہیں کہ نبی صلی اللہ علیہ وسلم نے فرمایا: ”اپنی عیدوں کو تکبیر سے زینت دو۔“

سیدنا انس رضی اللہ عنہ کہتے ہیں: نبی صلی اللہ علیہ وسلم نے عیدگاہ میں عید کی نماز اپنے چھوٹے نیزے کو سترہ بنا کر ادا کی۔

سیدنا ابن عباس رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”ذی الحجہ کے دس دنوں سے زیادہ فضیلت والا کوئی دن نہیں کہ جس میں عمل اس سے زیادہ فضیلت رکھتا ہو۔“ صحابہ نے کہا: جہاد فی سبیل اللہ بھی نہیں؟ آپ صلی اللہ علیہ وسلم نے فرمایا: ”جہاد فی سبیل اللہ بھی نہیں۔ مگر (وہ جہاد جس میں مجاہد کا) گھوڑا ذبح ہو جائے اور خون بہا دیا جائے۔“

سیدنا نعمان بن بشیر رضی اللہ عنہ کہتے ہیں: نبی صلی اللہ علیہ وسلم عیدین اور جمعہ میں ‏‏‏‏﴿سَبِّحِ اسْمَ رَبِّكَ الْأَعْلَى﴾ ‏‏‏‏ اور ﴿هَلْ أَتَاكَ حَدِيْثُ الْغَاشِيَةِ﴾ پڑھا کرتے تھے۔

سیدنا ابن عباس رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا: ”اللہ عز و جل کے ہاں کوئی عمل عشرہ ذی الحجہ کے اعمال سے زیادہ محبوب نہیں ہے، مگر جو شخص اپنا مال اور اپنی جان لے کر نکلے اور ان میں سے واپس کچھ نہ لائے۔“

سیدنا بلال رضی اللہ عنہ سے اسی سند سے ہے کہ نبی صلی اللہ علیہ وسلم جب عیدین کو نکلتے تو ایک راستے پر چلتے اور دوسرے پر واپس آتے۔

سیدنا بلال رضی اللہ عنہ سے اسی سند سے ہے کہ نبی صلی اللہ علیہ وسلم نماز عیدین خطبے سے پہلے پڑھتے، پھر پہلی رکعت میں سات تکبریں قرأت سے پہلے کہتے، پھر دوسری رکعت میں پانچ تکبریں قرأت سے پہلے کہتے۔ اور عید کے لیے پیدل چل کر جاتے اور پیدل واپس آتے۔ اور خطبے کے درمیان تکبریں کہتے، اور عیدین میں بہت تکبیر کہتے تھے۔

سیدنا بلال رضی اللہ عنہ سے اسی سند سے ہے کہ رسول اللہ صلی اللہ علیہ وسلم عیدین کا خطبہ کمان پر دیتے اور جمعہ کا خطبہ عصا پر دیتے۔

سیدنا ابوسعید خدری رضی اللہ عنہ کہتے ہیں: رسول اللہ صلی اللہ علیہ وسلم ایک گدھے پر قباء تک سوار ہوئے، آپ صلی اللہ علیہ وسلم پھوپھی اور خالہ کے متعلق کچھ معلومات حاصل کرنے کے لیے گئے تو اللہ تعالیٰ نے یہ بات نازل فرمائی کہ ان کے لیے کوئی وراثت نہیں۔