Al Muajam Al Sagheer Tibrani - Sunan

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جس شخص سے کوئی علم کی بات پوچھی جائے، وہ اس کو چھپا دے تو قیامت کے روز اس کو آگ کی لگام دی جائے گی۔“

سیدنا انس بن مالک رضی اللہ عنہ کہتے ہیں کہ نبی صلی اللہ علیہ وسلم نے فرمایا: ”جو شخص علم حاصل کرنے کے لیے گھر سے نکلا تو اس کا سفر واپسی تک فی سبیل اللہ شمار ہوگا۔“

سیدنا ابوقتادہ رضی اللہ عنہ کہتے ہیں کہ میں نے نبی صلی اللہ علیہ وسلم سے سنا: ”بہترین چیز جو مرنے کے بعد انسان پیچھے چھوڑ جاتا ہے وہ نیک اولاد ہے جو اس کے لیے دعا کرے، اور صدقہ جاریہ ہے جس کا اجر اس کو پہنچتا رہتا ہے، اور وہ علم جس پر اس کے بعد عمل کیا جائے۔“

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جس سے کسی علم کے متعلق پوچھا گیا، اور اس نے وہ چھپا لیا تو اسے قیامت کے روز آگ کی لگام پہنائی جائے گی۔“

سیدنا عبداللہ بن عمر رضی اللہ عنہما کہتے ہیں: رسول اللہ صلی اللہ علیہ وسلم نے فرمایا: ”اللہ تعالیٰ علم لوگوں سے چھین کر قبض نہیں کرے گا بلکہ علم کو علماء کے فوت کرنے سے اٹھائے گا، جب کوئی عالم نہ رہے گا تو لوگ جاہلوں کو مفتی بنا لیں گے، تو ان سے جب مسئلہ پوچھا جائے تو وہ بغیر علم فتویٰ دیں گے، وہ خود گمراہ ہوں گے اور اوروں کو بھی گمراہ کریں گے۔“

سیدنا عبداللہ بن عمرو رضی اللہ عنہما کہتے ہیں: رسول اللہ صلی اللہ علیہ وسلم نے فرمایا: ”مجھ سے پہنچاؤ اگرچہ ایک ہی آیت کیوں نہ ہو، اور بنی اسرائیل سے بیان کرو، اس میں کوئی حرج نہیں اور جس نے مجھ پر جان بوجھ کر جھوٹ باندھا وہ اپنی جگہ جہنّم بنا لے۔“

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”قیامت کے دن سب سے سخت عذاب اس عالم کو ہوگا جسے اس کا علم نفع نہ دے۔“

سیدنا ابن عبّاس رضی اللہ عنہما کہتے ہیں کہ میں سیدہ میمونہ رضی اللہ عنہا کے گھر میں تھا تو میں نے نبى کریم صلی اللہ علیہ وسلم کے لیے وضو کا پانى رکھا، آپ صلی اللہ علیہ وسلم نے پوچھا: ”یہ کس نے رکھا ہے؟“ کسى نے کہا: ابن عباس رضی اللہ عنہما نے۔ تو آپ صلی اللہ علیہ وسلم نے میرے کندھے پر ہاتھ رکھا اور فرمایا: ”اے اللہ! اس کو دین میں سمجھ عطا فرما اور اس کو قرآن و حدیث کى تاویل و تفسیر سکھا دے۔“

سیدنا ابن عمر رضی اللہ عنہما کہتے ہیں کہ نبى صلی اللہ علیہ وسلم نے فرمایا: ”میں ایک درخت کو جانتا ہوں جس کی مثال مومن کی طرح ہے۔“ تو میں نے دل میں سوچا اور میں سب سے چھوٹا تھا کہ وہ کھجور ہے۔ تو رسول اللہ صلی اللہ علیہ وسلم نے فرمایا: ”وہ کھجور ہے۔“

سیدنا ابوموسیٰ اشعری رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”اللہ تعالیٰ قیامت کے روز علماء کو اٹھائے گا پھر فرمائے گا: اے علماء کی جماعت! میں نے تمہیں اس لیے علم نہیں دیا کہ تمہیں عذاب کرنے کا ارادہ رکھتا تھا، جاؤ میں نے تمہیں معاف کر دیا۔“

سیدنا عمر بن خطاب رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”کوئی کمانے والا علم جیسی فضیلت نہیں کما سکتا جس کے ساتھ وہ اپنے ساتھی کی راہنمائی کر سکتا ہے یا اس کو ہلاکت سے ہٹا سکتا ہے۔ اور جس کا عمل درست نہیں اس کا دین بھی درست نہیں ہو سکتا۔“

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”اللہ تعالیٰ جس کے ساتھ خیر کا ارادہ کریں، اسے دین میں سمجھ دے دیتے ہیں۔“