Al Muajam Al Sagheer Tibrani - Sunan

سیدنا عبداللہ بن عمرو رضی اللہ عنہما کہتے ہیں: رسول اللہ صلی اللہ علیہ وسلم نے فرمایا: ”کوئی قوم بھی اس وقت تک ہلاک نہیں ہوتی جب تک وہ شرک نہ کرے، اور جو قوم بھی شرک کرتی ہے تو اس میں سے پہلا شرک تقدیر کو جھٹلانا ہے۔“

سیدنا انس رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”تمہارا بہترین دین اس کا آسان حصّہ ہے۔“

سیدنا جابر بن عبداللہ رضی اللہ عنہما کہتے ہیں: مجھے میرے ماموں جد بن قیس نے رسول اللہ صلی اللہ علیہ وسلم کى طرف بطورِ وفد کے عقبہ کى رات میں انصار کى طرف سے ستر آدمیوں میں سوار کیا، تو ہمارے پاس نبى صلی اللہ علیہ وسلم تشریف لائے۔ آپ صلی اللہ علیہ وسلم کے ساتھ آپ صلی اللہ علیہ وسلم کے چچا سیدنا عباس رضی اللہ عنہ بھى تھے۔ آپ صلی اللہ علیہ وسلم نے فرمایا: ”اے چچا جان! اپنے ماموؤں سے عہد لو۔“ تو آپ ( صلی اللہ علیہ وسلم ) سے ستر آدمیوں نے کہا: اے محمد صلی اللہ علیہ وسلم ! اپنے رب کے لیے اور اپنے لیے ہم سے جو چاہتے ہو مانگ لو۔ تو آپ صلی اللہ علیہ وسلم نے فرمایا: ”میں اپنے رب کے لیے تم سے یہ مانگتا ہوں کہ تم اس کى بندگى کرو اور اس کے ساتھ کسى کو شریک نہ کرو، اور میں اپنے لیے تم سے یہ مانگتا ہوں کہ میرى بھى اسى طرح حفاظت کرو جس طرح تم اپنی جان کى حفاظت کرتے ہو۔“ وہ کہنے لگے کہ اگر ہم اس طرح کریں تو ہمیں کیا ملے گا؟ آپ صلی اللہ علیہ وسلم نے فرمایا: ”تمہارے لیے جنّت ہوگى۔“

سیدنا عبداللہ بن عمر رضی اللہ عنہما کہتے ہیں: رسول اللہ صلی اللہ علیہ وسلم نے فرمایا: حلف میں قسم کو توڑنا ہوگا یا ندامت۔

سیدنا ابن عباس رضی اللہ عنہما کہتے ہیں کہ ایک آدمی نے نبی صلی اللہ علیہ وسلم سے کہا: میں اپنے دل میں ایسے خیالات پاتا ہوں کہ ان کو زبان پر لانے سے یہ بہتر سمجھتا ہوں کہ کوئلہ بن جاؤں۔ تو آپ صلی اللہ علیہ وسلم نے فرمایا: ”یہ صریح ایمان ہے۔“

سیدنا ابوبکرہ اور سیدنا عمران بن حصین رضی اللہ عنہما کہتے ہیں: رسول اللہ صلی اللہ علیہ وسلم نے فرمایا: ”حیاء ایمان سے ہے اور ایمان جنّت میں جائے گا، اور فحش گوئی بد اخلاقی ہے اور بد اخلاقی آگ میں لے جائے گی۔“

سیدنا ابوامامہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”خارجی جہنّم کے کتّے ہیں۔“

سیدنا انس بن مالک رضی اللہ عنہ نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”علم کو حاصل کرنا ہر مسلمان پر لازم اور ضروری ہے۔“

سیدنا حسین بن علی رضی اللہ عنہما فرماتے ہیں: رسول اللہ صلی اللہ علیہ وسلم نے فرمایا: ”علم حاصل کرنا ہر مسلمان پر فرض ہے۔“ اس کو سیدنا حسین بن علی رضی اللہ عنہما سے صرف اسی سند سے روایت کیا گیا ہے۔

سیدنا ابوہریرہ رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جس سے کوئی علم کی بات پوچھی گئی، اس نے وہ چھپا لی تو اسے قیامت کے روز آگ کی لگام پہنائی جائے گی۔“

یحییٰ بن ابی کثیر کہتے ہیں: جس نے یہ کہا کہ میں عالم ہوں تو وہ جاہل ہے، اور جو کہے کہ میں جاہل ہوں وہ جاہل ہے، اور جو کہے میں جنّت میں جاؤں گا تو وہ جہنّم میں جائے گا، اور جو کہے کہ میں جہنّم میں جاؤں گا تو وہ بھی جہنّم میں جائے گا۔

سیدنا ابوقرصافہ جندرہ بن خیشنہ لیثی رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”اللہ اس آدمی کو تر و تازہ رکھے جو میرى بات کو سن کر یاد رکھتا ہے اور اس کى حفاظت کرتا ہے۔ بہت سارے علم کے حامل اپنے سے زیادہ جاننے والوں تک پہنچاتے ہیں۔ تین چیزیں ہیں کہ دل کو ان پر خیانت نہیں کرنى چاہیے، ایک اخلاصِ عمل اللہ کے لئے، حاکموں سے خیر خواہى اور جماعت کے ساتھ لازم رہنا۔“