Al Muajam Al Sagheer Tibrani - Sunan

سیدنا عویم بن ساعدہ انصاری رضی اللہ عنہ کہتے ہیں: رسول اللہ صلی اللہ علیہ وسلم نے اہلِ قبا سے فرمایا: ”میں اللہ تعالیٰ سے سنتا ہوں کہ وہ پاکیزگی کے متعلق تمہاری بہت تعریف کرتا ہے، تو یہ کونسی پاکیزگی کی وجہ سے ہے؟“ وہ کہنے لگے: یا رسول اللہ صلی اللہ علیہ وسلم ! ہم کچھ نہیں جانتے مگر اتنی بات ہے کہ ہمارے ہمسائے یہودی پاخانے سے اپنی پیٹھوں کو دھوتے ہیں تو ہم ان کی طرح دھوتے ہیں۔

سیدنا واثلہ بن الاسقع رضی اللہ عنہ کہتے ہیں: جب میں مسلمان ہوا تو میں نبی صلی اللہ علیہ وسلم کے پاس حاضر ہوا تو آپ صلی اللہ علیہ وسلم نے مجھے فرمایا: ”پانی اور بیری سے غسل کر اور اپنے جسم سے کفر کے بال اتار دے۔“

سیدنا علی رضی اللہ عنہ کہتے ہیں: نبی صلی اللہ علیہ وسلم نے تین تین دفعہ وضو کیا۔

سیدنا عبداللہ بن عکبرہ رضی اللہ عنہ کہتے ہیں اور انہیں آپ صلی اللہ علیہ وسلم کے صحابی ہونے کا شرف حاصل ہے کہ: خلال کرنا سنت ہے۔

سیدنا ابوہریرہ رضی اللہ عنہ کہتے ہیں: نبی صلی اللہ علیہ وسلم نے فرمایا: ”جب تم میں سے کسی کے برتن میں کتا منہ ڈال دے تو اس کو پاک کرنا اس طرح ہے کہ اسے سات دفعہ دھو لیا جائے۔“

سیدہ عائشہ رضی اللہ عنہا کہتی ہیں: بسا اوقات میں نبی صلی اللہ علیہ وسلم کے کپڑے سے منی کو رگڑتی، پھر آپ صلی اللہ علیہ وسلم اس میں نماز ادا کرتے۔

عمرو بن شعیب عن ابیہ عن جدہ کہتے ہیں: رسول اللہ صلی اللہ علیہ وسلم نے فرمایا: مستحاضہ عورت ایک حیض سے دوسرے حیض تک غسل کرے۔

سیدنا علی رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”جس نے غسلِ جنابت میں جسم کا ایک بال بھی نہ دھویا تو اس کے ساتھ جہنم میں ایسا اور ایسا سلوک کیا جائے گا۔“ سیدنا علی رضی اللہ عنہ کہتے ہیں: اسی لیے میں سر کے بالوں کا دشمن ہو گیا ہوں۔ اور آپ اپنے بال کاٹ دیا کرتے تھے۔

سیدنا ثوبان رضی اللہ عنہ کہتے ہیں: رسول اللہ صلی اللہ علیہ وسلم نے فرمایا: ”سیّدھے ہوجاؤ اور تم سب کچھ حاصل کرنے کی ہرگز طاقت نہیں رکھتے، اور جان لو کہ تمہارے بہترین اعمال میں سے نماز ہے، اور وضو کی حفاظت صرف ایمان دار آدمی کرتا ہے۔“

سیدنا ابوطلحہ رضی اللہ عنہ کہتے ہیں: نبی صلی اللہ علیہ وسلم نے وضو کیا تو موزوں اور چادر یعنی پگڑی پر مسح کیا۔

سیدنا حذیفہ بن یمان رضی اللہ عنہ کہتے ہیں: رسول اللہ صلی اللہ علیہ وسلم جب رات کو اٹھتے تو اپنے منہ کو مسواک سے صاف کرتے۔

سیدنا خزیمہ بن ثابت رضی اللہ عنہ کہتے ہیں: رسول اللہ صلی اللہ علیہ وسلم نے موزوں پر مسح کرنے کے متعلق فرمایا: ”تین دن اور ان کی راتیں مسافر مسح کر سکتا ہے اور ایک دن اور رات مقیم مسح کر سکتا ہے۔“